MLA-in Ngaizawl Rain Water Harvesting Dam tlawh; Hnahlan PHC hnenah ambulance leh oxygen bur a hlan

Adviser to CM H Ginzalala, Champhai North bialtu MLA ni bawk chuan nimin khan Ngaizawl Rain Water Harvesting Dam a tlawh a; Hnahlan PHC hnenah Power Grid Corporation of India Limited CSR fund aṭanga dawn ambulance pakhat leh oxygen bûr hnih a hlan.

H Ginzalala hian a bial chhung Ngaizawl khuaa ruahtui dahkhawlna tura duan tuikhuah 'Rain Water Harvesting Dam' a tlawhnaah he project hi a puitling thei a nih chuan sangha khawi nan te, loneituten an thlai chìnte tana tui an lakna atan bakah tuihna humhalhna atan hman tum a nih thu a sawi a, "He tuikhuah hi Eco-Tourism lam tihhmasawnna atan te, tui lama infiamna (water sport) atante pawh hman a nih theih kan beisei," a ti.

Ngaizawl Rain Water Harvesting Dam project atan hian MP Fund aṭangin cheng nuai 15 leh MGNREGA aṭangin cheng nuai 10 hman ral a ni tawh.

Adviser to CM H Ginzalala hian nimin vek khan Power Grid Corporation of India Limited corporate social responsibility (CSR) fund hmanga lei ambulance leh oxygen bûr hnih chu Hnahlan PHC hnenah a hlan a; H Ginzalala chuan, "Hnahlan leh a chhehvel khua ten Power Grid Corporation of India Ltd. kaltlanga Hnahlan PHC-a hman tur ambulance leh oxygen bur an dawng thei hi a lawmawm hle," a ti a, Hnahlan khua hi ramria awm a nih angin damlo tam tak tlan khawmna hmun a nih avangin healthcare infrustructure tihchangtlun a ṭul thu a sawi bawk.