Education dept-in Meichher Award 2025 hlan

School Education department chuan nimin khan thla tina an tihchhuah ṭhin 'Meichher' chanchinbua nikum chhunga thuziak ṭha leh thawhhlawkte hnenah 'Meichher Award 2025' an hlan a; Meichher chanchinbua thuchhuahte zingah hian sikul leh college zirlaibua seng luh thuziak 22 a awm tawh.

Meichher Award hlanna inkhawm hi School Education Directorate conference hall-ah neih a ni a; khuallian Angela Zothanpuii, School Education director ni bawk chuan, "Meichher hi Mizo thu leh hlaa kan article lar tak tak lo chhuahna a ni a, thuziaktute pawh mi chhuanawm tak tak an ni. Thu leh hla hi mihring min vawngtu pawimawh a nih avangin ṭhartharte hian lehkha ziak hlutna hi kan hriat thar leh a ngai a, hnam pum leh department pawhin hma kan lak nasat a ngai hle," a ti.

Angela Zothanpuii chuan, sapṭawng thiam ngaihsanna hi thlak a hun tawh tih sawiin, "Mahni hnam ṭawng ngaihsanna kan neih a, kan chawisan zel a ngai," a ti a; Meichher chanchinbua chhuak thu leh hla ziak ṭhinte chungah lawmthu a sawi bawk.

Meichher chanchinbu editor TC Lalremsiama tarlan danin, Meichher chanchinbu hi 'Zoram Êng' tih hming vuahin March/April, 1975 aṭang khan thlakipa tihchhuah ṭan a ni a; October, 1975 aṭang khan 'Meichher' tia thlak a ni. Nikum 2025 khan Meichher chanchibu hian kum 50 a tling a, kum 1975 March & April thla chhuak aṭanga chhiarin kumin January-a chhuak Meichher chanchinbu kha bu 815-na a ni.

Meichher chanchinbu publisher atan School Education Director hman ṭhin a ni a; Meichher editor hmasa ber chu R Lalrawna niin, Meichher chanchinbua thu chhuahte zingah hian zirlaibua seng luh thuziak 22 a awm tawh a, heng thuziakte hi sikul leh college-a Mizo zirlai atan hman an ni ṭhin.

Award semna inkhawmah hian Mizo Academy of Letters general secretary Dr Zoramdinthara leh Mizo Writter Association president R Lallianzuala te pawhin award dawng tur an endik dante an sawi a; department hotute bakah thuziak mite, award dawngtute leh ṭawiawmtute an tel a ni.