KHAWTHLIR

NDD February Round 2026

Lunglei District Level Co-ordination Committee for National Deworming Day (NDD) chuan additional DC Rochuangkimi Khenglawt hoin tun hnai khan February 10, 2026 aṭanga ṭan tur 'NDD February Round 2026' kalpui dan tur an rel a; NDD February Round-a rulhut hlo pek tur atan hian Lunglei district-ah kum 1-19 inkar mi 44,526 tinzawn an nih thu tarlan a ni.

Fire Prevention Week

Khawzawl District Level Committee on Fire Prevention chu an chairman K Vanlalṭhiana, bawrhsap kaihhruaiin nimin khan sorkar hotu te, khawtlang leh pawl hruaituten February 9-13, 2026 chhunga Fire Prevention Week 2026 hman dan tur an rel a; awareness campaign a tam thei ang ber neih ni se, middle school level chin tan poster leh reels siam hmanga inelna neih ni bawk se an ti.

Thei ṭiak sem

Champhai North bialtu MLA H Ginzalala chuan nimin khan a bial chhung khaw ṭhenkhat a tlawh a, Hnahlan Lailiphai leh Khuangphah rama chîn tur thei ṭiak hrang hrang - pear, peach, plum, apricot, persimmon leh kiwi ṭiakte a sem. NABARD sum hmanga Laili Phai agriculture link toad laih mek a enfiah nghal bawk.

Road Safety Month

Nimin khan Siaha DRDO conference hall-ah addl. DC Abraham Beirazi chuan Road Safety Month a hawng a, thupui atan 'Road Safety – Life Safety' tih hman a ni. Road Safety Month hawnnaah hian Mizoram sorkar department official, MADC official, Assam Rifles, tlawmngai pawl, leh driver association aiawhte an tel.

AR hotuin enfiah

Assam Rifles director general Lt. Gen. Vikas Lakhera chuan February 3, Thawhlehni khan Serchhip, Champhai leh Zokhawthar a tlawh a, India leh Myanmar ramri leh Assam Rifle-te hnathawh dan a enfiah.