Serchhipah district pum huap Ruihhlo ngaite pual camping

Serchhip district Nasha Mukht Bharat Abhiyan (NMBA) chuan February 9-20, 2026 chhung khian Serchhip district pum huap ruihhlo ngaite pual camping a buatsaih dawn a; camping atan hian kohhran leh mimal hrang hrangte'n Rs 9,91,000 an chhungkhawm tawh.

Ruihhlo ngaite pual camping neih tur chung-changah hian nimin khan Serchhip DC conference hall-ah Serchhip district NMBA member-te an ṭhukhawm a, hmalakna leh hmachhawpte thlirho niin, camping neih chhung hian doctor, nurse leh pharmacist-te'n camper-te an vil reng dawn thu leh, damdawi leh zu lama harsatna nei an awm chuan medical team-te hian damdawi ṭhate nen buaipuiin an enkawl dawn thu tarlan a ni.

Sorkar thuchhuah tarlan danin, camping buatsaih tur atan hian bialtu MLA Lalduhoma, chief minister chuan Rs 2,50,000 a thawh a, Serchhip district-a kohhran hrang hrang 44-in Rs 3,11,000 leh mimal ṭhahnemngaite'n Rs 4,30,000 an thawh tawh bakah, sum leh pai thawh remchang thei lote pawhin camping chhunga ei leh in tur, chawhmeh te, a thâ ang zawngte pawha thawh mi eng emaw zat an awm tawh a ni.

NMBA hi Drug free India Campaign niin, sorkar lakpui Ministry of Social Justice and Empowerment hnuaia hmalakna a ni a; he hmalaknain a tum ruihhlo ti mekte'n an sim theihna tur leh a la ti ngai loten an tihchhin lohna tura hmalak (demand reduction) a ni. NMBA District level committee hian hmalakna turte a duang ṭhin a, sorkar office, khawtlang leh tlawmngai pawlte chu hmalak dan tur rawtna thehlut tura sawm ṭhin an ni.