Mitdel leh bengngawngte tana POCSO Act hrilhfiahna tlangzarh

Adviser to chief minister Lalmuanpuia Punte, MLA chuan nimin khan IPR Lianchhiari Rûn-ah Mizoram State Commission for Protection of Child Rights (MSCPCR)-in an buatsaih mitdelte chhiar theih tura POCSO Act 2012 hrilhfiahna lehkhabu leh zaizir hmanga POCSO Act hnuaia dan bawhchhiat theihte leh hremnate tarlanna video a tlangzarh.

Lalmuanpuia Punte chuan, MSCPCR hian naupang zawng zawng an enkawl thu a sawi a, "Naupang zawng zawngte hmakhua leh an himna tur a ngaihtuahnaah MSCPCR chuan naupang pianphunga rualbanlo (mitdel, bengngawng leh ṭawngtheilo)-te pawh a ngaihtuah tel vek a, an tan hian a bîk takin Project CLEAR (Child Laws for Everyone : Accessible & Readable) a siam. He project hnuaiah hian hursualna laka pianphunga rualbanlote an lo him zawk theihna turin lehkhabu leh video hi siam a ni," a ti.

Lehkhabu leh video tlangzarh takte chuan pianphunga rualbanlote nasa taka a puih a, a venhim a beisei thu Adviser to CM chuan a sawi a, "Kan ram danpui, Constitution leh UNCRC-ten naupang dikna leh chanvo humhalh a nih theihna tura mi zawng zawngte zawm tur leh tih tur min tukte hi ṭha taka zâwmtu leh tlângaupuitu kan nih a pawimawh," a ti a; Mizorama naupangte an lo hlim a, an lo him a, rilru, tisa leh thlaraua a ṭha zawnga an lo ṭhanlen zel theih nan ṭangrual ṭheuh turin Mizoram mipui a sawm.

MSCPCR hi kum 2018 khan Parliament Act hmanga din a ni a; naupang dikna leh chanvo humhalh kawngah child care institution, sikul, hostel, damdawi-in leh jail-te an endik ṭhin a ni. MSCPCR buatsaih lehkhabu leh video tlangzarhte hi 'POCSO Act, 2012 hnuaia naupang laka hursualna leh a kaihhnawih hrilhfiahna leh a hremna awm theite (Braille Edition)' leh 'Video Clip in Sign Language on Sexual Offences and Punishments Mentioned under The Protection of Children from Sexual Offences (POCSO) Act, 2012' te an ni.