Healthy Lunglei App tihchangtlun dan tur sawiho

February 2, Thawh­lehni khan Lungei DC Office, Health leh IPR department official-, Lungleia damdawi zuar (pharmacist) leh LushAITech aiawhte chu Lunglei bawrhsap Navneet Mann kaihhruaiin a pisaah Healthy Lunglei District Campaign kaltlanga January 29, 2026-a tlangzarh tak 'LushAI Healthy Lunglei Mobile App' chu mipuite'n ṭangkai zawka an hman theih nana tihchangtlun dan tur leh tihlar dan tur an sawiho.

Thawktute leh mipuite'n LushAI Healthy Lunglei App an hman dan report ngaihthlak niin, tihchangtlunna tur rawtna hrang hrang sawiho a ni. Ayushman Bharat Health Account (ABHA)-a inziah luhnaa siam rem ngai chu LushAITech lamin lo siam rem se tih niin, damdawi lei tur tan doctor-in damdawi a chawhna lehkha thil tel (upload) ngei ngei a ṭul avangin a dah luhna tur siam tel ni se, tih a ni. Damdawi chahtute an duhna taka pek chilh (deliver) man felfai leh tlawm zawk a awm theih nan damdawi zuarte nen sawiho a, ruahmanna siam ṭha tih a ni.

Healthy Lunglei App hi Android Playstore aṭangin mi 160, Apple iOS App Store aṭangin mi 70, belh khawmin mi 230-in an phone-ah an dah lut (download) tawh tih tarlan a ni. Mi tam zawkin an hman ṭangkai theih nan branch YMA leh college hrang hrangahte mawhphurtu bik (nodal officer) inruatin, nidal officer-te tan March thla laihawl velah inzirtirna buatsaih ni se, tih a ni. App hmang ṭha zual YMA branch 3 leh college -te tan lawmman siam ni se, tih a ni bawk.

LushAI Healthy Lunglei app hmang hian district chhunga sorkar damdawi-in leh health centre-a doctor ṭhut hun tur a en theih bakah, OPD-a inentir turin appointment a lak lawk (book) theih. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihnate awmin, hriselna lama hriat tur pawimawh hrang hrangte pawh awlsam takin a hmuh theih.