Ruihhlo dona tur dan pawm
Nimin Assembly session-ah Social Welfare minister PC Lalthanliana put luh, The Mizoram Drug (Controlled Substances) Bill, 2016 chu sawiho a nih hnuah pawm a ni.
The Mizoram Drug (Controlled Substances) Act hmang hian sorkar chuan ruihhlo chak zawka do a nih theih a beisei. Bill siamnaah hian Social Welfare department chu nodal department a ni a; dan hi hman a nih hun chuan a kengkawhtu tur chu Police, Excise & Narcotics leh Health department-te an ni ang.
Dan duangtute tarlan danin, The Narcotic Drugs and Psychotropic Substances (NDPS) Act hnuaia ruihhlo vanga man thiam loh changte tàn hun chhung rei lo ber kum 10 tih chuan ruihhlo vanga man thiam loh chang an tlem phaha hriat a ni a; The Mizoram Drug (Controlled Substances) Bill, 2016 hnuaiah chuan ruihhlo kaihhnawiha mante tàn hun chhung rei lo ber chu kum 5 ni tura ruahman a ni.
NDPS Act hnuaiah chuan ganja chu a pár leh a rahte cannabis thlai anga tarlan a ni a, mahse, Mizorama ganja an mante chu cannabis hnah phoro túr ngah tak, a pár leh a rah tel lo a nih avangin, ganja vanga mante hremna a ṭha tawk ṭhin lo. Dan tharah chuan, eng thil pawh Mizoram sorkarin notification hmangin control substance-ah a puang thei dawn a ni.
In chhunga ṭangkai taka hman ṭhin Dendrite leh Erasex-te chu NDPS Act hnuaiah telh a ni lo a, mahse, hengte hi túr hlauhawm tak, Mizoramah ṭhalai tam takin an hman sual a nih avangin, dan tharah chuan Mizoram sorkarin notification hmangin control substances-ah a puang thei bawk ang.
Pseudoephedrine pawh NDPS Act hnuaiah chuan thawn chhuah leh lak luh chiah hrem theih a ni a; drugs licence neite'n dan bawhchhe si loin Methamphetamine siamna atan Mizoram páwna an thawn chhuak ṭhina hriat a ni. Hei vang hian, dan tharah chuan Pseudoephedrine chu khauh zawka khuah-khirh a nih theih nan notification hmangin control substance-ah puan theih a ni dawn.
Hengte bakah hian, ruihhlo dang chi hrang hrang, dan hnuaia mumal taka khuahkhirh si lohte chu dan thar hnuaiah chuan sorkarin control substance-ah a puang thei dawn a ni.