Ruihhlo doah sorkar a phur - CYMA President; YMA-te'n ruihhlo dona tur motor dawng dawn
Bethlehem Vengthlang Branch YMA chuan January 29, Ningani zan khan an office-ah YMA Kumpuan hawn inkhawm an buatsaih a, a hawngtu Central YMA president R Lalngheta chuan, ruihhlo doah sorkar an phur thu a sawi.
R Lalngheta chuan Pathianin YMA a hruai nasa hle tih sawiin, "Pathian malsawmna kan dawng a, hriat loh lam aṭangin ṭanpuina kan dawng nawlh nawlh mai. Sub-Headquarters YMA-ten ruihhlo dona atana an hman tur motor kan dawng dawn a, tunah hian a lo thleng tawh. Hei bakah hian mini-sport complex siamna tur pawh hmuh mai theih kan inring. Heng bakah hian ruihhlo dona tur sum ṭhahnem tak kan hmuh hmel. Hengte hi kan fel vang ni loin Pathianin YMA-te min ensan loh vang a ni," a ti.
Ruihhlo do tur hian sorkar pawh a phurin, a inhawng hle tih sawiin CYMA President chuan, "Ruihhlo ngaite enkawlna tur kan hriat loh laiin ṬBCC an inhawng hlauh. Hetianga ruihhlo ngaite dah nana kan home hmante pawh sorkar lamin an theih ang angin an thuam ṭha a, a lawmawm tak zet a ni. Kan ram hi ram nuam a nih theih nan ruihhlo hi kan theihtawpa kan do a ṭul. CYMA-in ruihhlo do turin Aizawl khawpui chhung hi zone-ah ṭhen kan tum a, kan ṭhen fel ṭep," a ti a, zone-a ṭhenfel a nih veleh mahni zawnah ṭheuh ṭhahnemngai taka thawk turin YMA member-te a sawm.
R Lalngheta chuan ruihhlo do kawngah kohhrante nena thawhho a ṭul tih sawiin, "Chumi tur chuan hma kan la dawn. Ruihhlo kalkawng kan ni a, ruihhlo zuarte pawh an sim duh loh chuan kan pal ang. Kan tih loh chuan kan tu kan fa ten min la dem ang. Tute maw kut a dah loin keimahni tih turah i dah ang u. Dik lo tak a sum la lut thin te hi i hnawl ngam ang u. Ruihhlo do hi Pathian duh zawng leh ram leh hnam damna tur a ni a, chuvangin kan ṭanrual a ngai. Amaherawhchu, ruihhlo do tute hi kan kut a fai a ngai, hluihlawn thil kan la tur a ni lo. Pathian ṭih chungin ruihhlo i do ang u," tiin YMA member-te a sawm.
CYMA President sawi danin, ruihhlo ngaite hi chhanchhuah theih an la ni a, ruihhlo do kumpuan a an lo hman tawhah chhanchhuah an nei nual. A ṭhen chu missionary-ah te, zaipawl conductor-ahte an ṭang tawh.