NCC, Mizoram Group Hqrs hawn a ni

Chief minister Lalduhoma chuan nimin khan a pisaah National Cadet Corps (NCC), Mizoram Group Headquarters a hawng. Assam state aṭanga awp ṭhin NCC Mizoram chuan ama pualin group headquarters a nei tawh dawn a ni.

CM Lalduhoma chuan, Mizoramin NCC group headquarters a nei ta chu a lawm thu a sawi a, "Kan ṭhalaite hian NCC hi phûr takin zawm se, nun kaihhruaina ṭha hmuh nan hmang se kan duh. Ruihhloin ṭhalai tam tak a tibuai a, heng thil ṭha lo lakah hian ṭhalaite kan vèn a ṭul. Ṭhalai fel leh vengva tak tak kan neihte'n an theihna leh thiamnate zau zawkin pho chhuak thei se kan duh a, chu'ngte ngaihtuah chung chuan group headquarters hi nei ve ila kan ti a ni," a ti.

NCC North Eastern Region additional director general Maj. Gen. Anurag Vij chuan, "State sorkarin ṭhalaite nun kawng dik zawha kaihhruaina lam hawi hmalak ṭul a tihna apiangah hma kan la thei," a ti a; ṭhalaite chu mahni inthunun thei, tumruh, ram, khawtlang leh chhungkaw tana ṭangkai ni tur te, ruihhlo leh nun dan ṭha lo laka fihlim turtein a ṭul ang zelin an zirtirin an kaihruai ṭhin tih a sawi.

Hawnna inkhawm zawhah Chief Minister hoin NCC NER ADG leh Group Hq, Aizawl commander Brig. GS Arora bakah, Sports & Youth Services minister Lalnghinglova Hmar ten NCC Mizoram Group Headquarters awmna hmunhma tur an sawiho nghal. State sorkarin an awmna tur ram a pek (luahtir) theih chuan an hmunhma chu an sak theih thu NCC hotute chuan an sawi.

Mizoramah NCC unit pali awmin, cadet 8,000 vel an awm mek a; group headquarters nena an awm chuan an tilian chho zel dawn a ni.