Entrepreneur-te harsatna tawh ṭhin Bána Kaih hmangin kan sukiang dawn - Chief Minister

Chief minister Lalduhoma chuan nimin khan Aijal Club-ah Mizoram Bána Kaih Venture Capital Fund leh Startup Readiness Level of Mizoram a tlangzarh a; Bána Kaih hmangin kutkawih eizawnna buaipuitu (entrepreneur)-te harsatna tawh ṭhin sutkian a nih dawn thu a sawi.

CM Lalduhoma chuan, kum tam tak chhung chu Mizoramah thiamthil leh ngaihtuahna ṭha tak tak nena sumdawnna bei an awm tawh ṭhin tih a sawi a, "Thlàwpna leh puihna an hmuh ṭhat loh avangin an sumdawnna a ṭhang thei lo a, an suangtuahna a tak ramah a chang thei lo ṭhin," a ti.

Entrepreneur-te'n bul ṭanna tur an mamawh ang sum an nei lo ṭhin tih sawiin Lalduhoma chuan, "Kawng kawhhmuhtu ṭha an nei lo a, sumdawnna lian leh hlawhtling din turin kawng zawh tur mumal an hre lo ṭhin," a ti a, chutianga harsatna chu Bana Kaih Venture Capital Fund-in a sutkian dawn thu a sawi.

Chief Minister chuan, Bana Kaih Venture Capital Fund chu sum thlâwnpek a ni lo a, thawhlawm pawh a ni lo tih sawiin, "Rinna leh inrin tawnna nena sum peipunna a ni. Entreprenuer hma hun êng tak nei leh ṭhang zel tura theihna nei, eizawnna bul ṭantute a pui dawn," a ti.

Pawisain sumdawnna a ṭhantir thei tih sawiin Lalduhoma chuan, "Inrintâwkna hian hma lam pan turin a pui thei a, chumi kawngah chuan Start Up Readiness Level of Mizoram hi a pawimawh," a ti a, entreprenuer-te leh eizawnna kawng danga hmalakna tur tarlangtu pawimawh a nih thu a sawi.

CM Lalduhoma chuan, an hmalaknate'n ṭhalaite hmakhua an ngaihzia a tilang nia sawiin, "Hmasawn tura kan tumruhzia pawh a tilang. Investor leh firm liante'n Mizoram hi hmun kilkhawr tak anga hmu loin, tih tur remchang tam em emna hmun a ni tih min hmuhsak se kan duh," a ti.

Inkhawmah hian Higher & Technical Education minister Dr Vanlalthlana, Commerce & Industries minister F Roding-liana leh LESDE minister Lalnghinglova Hmar te pawhin thu an sawi.

Bana Kaih Venture Capital-ah hian target-ah cheng vbc 100 dah a ni a, sorkarin Bána Kaih aṭangin cheng vbc 20 a pe (tiam) a, a dang chu kawng dang aṭanga hmuh tum a ni. Pool fund a nih angin Security Exchane Board of India (SEBI)-ah trust registration neih a ngai a, Senhri Investment Fund tia register neih a ni.

Operating partner tur company thawhpui a ni a, SEBI-a ziah luh a nih angin India ram ngaihtuah chunga kalpui a ṭul. A tum bul ber erawh Mizoram entrepenuer-te'n bul an ṭan nan emaw hma an sawn zelna tura hma an lakna tur sum, dan ang thlapa tumpui a ni.

DPIIT hnuaia registered startup-ten an dil thei a, chutiang registered startup chu 42 chauh Mizoramah an la awm avangin a dil thei hi neih tam a ṭul.

Mizoram Outstanding Entrepreneurs & Startups Award 2026 sem a ni a, Mizoram Outstanding Entrepreneurs & Startups Award 2026 – Ecosystem Enabler lawmman Dr C Vanlalramsanga, IES hnenah hlan a ni.