India Danpui hian thlei bik a nei lo - Home Minister

Aizawl Theological College (ATC) chuan nimin zing dar 7 khan an hmunah Republic Day vawi 77-na an lawm a; an hun hmanpuitu Home minister K Sapdanga chuan, India Danpuiin thlei bik a neih loh thu a sawi.

ATC-a Republic Day lawmna hi principal Rev. Dr K Lalrinkima'n a kaihruai a, Home Minister hian hnam puanzar a pawt pharh a ni.

Home Minister chuan, "Vawiina India hnam puanzar kan pawh pharh hian mahnia ro inrel a, dan mumal tak neia hun kan hman ṭanna ni min hriat chhuahtir se. India ram hi dikna, intluktlanna leh inpumkhatna ram ropui tak a ni tih min hriat nawntir se. Kan hnam puanzar rawng chi thum hi awmze neia duan a ni a, ram tana an nunna hlu tak lo hlantute leh mahnia ro inrêlna lungphûm pawimawh tak a entir a ni," a ti.

ATC chu Mizorama Pathian thu zirna hmun hlu tak a nih thu sawiin K Sapdanga chuan, "He hmun hi rilru dik leh thinlung dik nei tura inzirna hmun lo ni zel se, ram tana zirna in hlu tak ni chhunzawm zel turin duhsakna ka hlan a ni. Pathian thu leh India Danpui hi thil kal kawp ṭha tak mai a ni a, rinna leh ram hmangaihna hi thil inzawm nghet tak ti pawhin kan sawi thei ang," a ti a, rinna leh ram hmangaihna chuan tum thuhmun an neih thu a sawi.

Home Minister chuan, India Danpuiin thlei bik a neih loh thu sawiin, "Mi zawng zawng a huap vek a, mi rethei, mi chak lo leh ṭanpui ngaite an dikna humhimsak hi a tum lian tak a ni. Vawiinah hian hruaitu ṭha leh khua leh tui huaisen India Danpui ngai pawimawh mi kan mamawh. Republic Day hian zalenna, inpumkhatna leh dikna min neihtir thar leh se. He College-a zirlai leh zirtirtu zawng zawngte beiseina thar min siamtu kan khawtlang nun siamṭhatna hmanraw ṭangkai lo ni zel turin duhsakna ka hlan a che u," a ti.