Minister-in K Lalnunsanga lawmpuina hlan
Sports & Youth Services minister Lalnghinglova Hmar chuan nimin khan a pisaah FMSCI Indian National Motorcyle Racing Championship 2025-a pahnihna K Lalnunsanga hnenah lawmpuina a hlan a; infiammi tu pawh an hlawhtlinin sorkar a lawm ṭhin tih a sawi.
Lalnghinglova Hmar chuan, K Lalnunsanga hlawhtlinna chu a lawmpui thu sawiin, "Kan infiammi tu pawhin hlawhtlinna an chan hian sorkar chu kan lawm ṭhin a, India ram huap ang inelnaah phei chuan Mizo tihmingṭha tu an ni a, kan chhuang ṭhin. Nunsanga pawh national level-a hetiang a thleng thei hi kan lawm hle a ni," a ti.
Infiamna lamah Mizoramin hmasawnna tur tam tak a la nei tih sawiin Minister chuan, "Infiamna discipline hrang hrangah hlawhtlinna ṭha kan nei ve ta fo a, a lawmawm, mahse, hmabak a la thui hle," a ti a, tun aia sang thleng tura ṭan la zel turin infiammite a chah.
Sports Minister chuan, Mizoram MotorSports Association (MIMSA) hruaitute inpekna leh hmalakna fakawm a tih thu sawiin, "Motorsports lam hi a sensote a danglam deuh avangin a hautak hma a, Mizoram State Sports Council-in budget tam tak kan pe thei lo chung pawhin hruaitute lam an ṭang hram hram ṭhin a, fak an phu tak zet a ni," a ti.
Lawmpuina inkhawmah hian MSSC vice president Dr Lalhmuchhuaka bakah, MIMSA hruaitute leh K Lalnun-sanga ten thu an sawi.
K Lalnunsanga, Electric Veng, Aizawl hi MRF leh Madras Motorsports Club-in an buatsaih Federation of Motor Sports Clubs of India (FMSCI) Indian National Motorcycle Racing Championship 2025-ah Stock 130 - 165cc Novice Category inelnaah telin, pahnihna a ni. June 2025 aṭang January 2026 chhung khan round nga inelna neih niin, intlansiak vawi 10-ah Nunsanga hi ṭum hnih pakhatna niin, ṭum li pahnihna a ni bawk.