Ruang Phurh online portal hawng

Social Welfare minister Lalrinpuii chuan nimin khan Aijal Club-ah online hmanga ruang phurh dil theihna tura siam 'Ruang Phurh' online portal a hawng. Nimin thleng khan sorkarin ruang 1,680 phurhna atan cheng nuai 175.85 a seng tawh tih tarlan a ni.

Minister Lalrinpuii chuan, Ruang Phurh online portal chu ZPM-in sorkarna an siam hma pawha an lo ngaih pawimawh tawh leh manifesto-a an neih tihhlawhtlinna a nih thu a sawi a, "Tluang taka hmasawn zawnga ruang phurh scheme kalpui a ni hi a lawmawm," a ti a; portal hmang ṭangkai turin mipui a sáwm.

Ruang Phurh online portal hi Information and Communication Technology department hnuaia Mizoram State e-Governance Society (MseGS) siam a ni a; Google Play leh App Store aṭangin lak theih a ni.