ZMCH leh IOC ten MoU an ziak

Zoram Medical College & Hospital (ZMCH) leh Indian Oil Corporation Limited (IOC) chuan nimin khan inremna thuthlung, memorandum of understanding (MoU) an ziak. Inremna angin IOC-in corporate social responsibility (CSR) aṭangin ZMCH tan cheng nuai 62.38 man khawl chi hrang hrang an lei dawn.

MoU-ah hian ZMCH director Prof. Zoramthara Zadeng leh IOC (HR-CSR) senior manager Malati Makar ten hming an ziak. IOC hian an CSR aṭangin ZMCH hnenah damdawi-in tihchangtlunna tur khawl leina tur cheng nuai 62.38 a pe dawn a; ALS (Advanced Life Support) ambulance, diathermy machine leh C-arm equipment te lei a ni ang.

Prof. Zoramthara Zadeng chuan, IOC-in CSR aṭanga ZMCH hnena ṭanpuina an pe chu an lawm thu leh, hmanrua an lei turte chu damlo enkawlnaa hma an sawnpui tur, damlote'n an chhawr ṭangkai tur a nih thu a sawi.

Malati Makar chuan, IOC-in mipui hamṭhatna an ngai pawimawh a, an CSR chu vantlang hriselna kaihhnawih lamah an hman nasat thu a sawi bawk.