Committee on Petitions report sawifiah; 'Committee on Petitions report mi hmaa sawi chhuah hi dan kalh a ni' - Chairman

Legislative Assembly-a Committee on Petitions 2025 chairman T Lalhlimpuia chuan thuchhuah siamin, PM-USHA chungchangah Committee on Petitions-in sum kal fel lo an chhui Io a, chhui turin committee hran a din Io tih a tarlang a; Committee on Petitions report chungchang press mi emaw, mi dang emaw hmaa sawi chhuah chu dan kalh a nih thu a sawi bawk.

T Lalhlimpuia chuan, Committee on Petitions-in December 22, 2025-a Higher & Technical Education department-in PM-USHA hnuaia tender a chhuah chungchangah petition awm vanga an thurel (report/recommendation) Assembly Speaker hnena MLA Rohmingliana’n a thehluh chungchangah hriat chian tâwk loh a awm thu a tarlang a ni.

Committee on Petitions Chairman tarlan danin, December 22, 2025 khan Chairman-in tih tur dang a neih avangin Mizoram Legislative Assembly Rules of Procedure and Conduct of Business, Chapter XXVIII-228 phal angin Committee on Petitions aiawha Speaker hnenah report (recommendation) thehlut turin member zinga mi Rohmingliana ruat a ni a; ruat a nih angin Rohmingliana chuan report chu Speaker hnenah a thehlut.

Committee on Petitions thurel (recommendation) hi Legislative Assembly Rules of Procedure and Conduct of Business Chapter XXVIII 227-in a tarlan angin, thuruk (confidential)-a vawn tur a ni a, report thehluttu member hi Speaker hnena recommendation a thehluh bak chu a tih tur dang Committee on Petitions-in a pe Io.

Committee on Petitions report (recommendation) thehluttu member-in Speaker hnena report a pek bak thuthar thehdarhtute hmaa puan chhuah emaw, mi tu emaw hnena sawi chhuah chu Committee on Petitions-in a hriatpui Io tih tarlangin T Lalhlimpuia chuan, "Hetianga thil tih a awm a nih chuan 'Rules of Procedure and Conduct of Business in Mizoram Legislative Assembly' dan kalh a ni ang," a ti.

'PM-USHA hnuaia sum kal fel lo chhui tura Committee dinin Speaker hnenah report an thehlut; tender chhuah nawn an rawt' tia media-a tarlan chungchang sawiin T Lalhlimpuia chuan, "Committee on Petitions chuan sum kal fel lo a chhui Io a, PM-USHA chungchang chhui turin committee hran a din Io a, special report a thehlut Io bawk," a ti a; an thil chhui chu sum chungchang ni loin, tendering process chungchang a nih thu a tarlang.

Committee on Petitions Chairman chuan, Committee chuan tender process hrilhfiah dan inan loh vanga thil fel lo awm nia lang a chhui a, tender nawn (re-tender) turin recommendation a siam tih a tarlang a, "Tuna PM-USHA chungchang bakah hian thu dang pahnih bawhzui lai a nei mek. Committee on Petitions hian an hnena petition lut, enchian zui ngai nia a hriatte chu a ngaihtuah ṭhin. Sum kal fel lo chhui tura a hranpa leh a bik taka committee din a ni anga sawi hi thu dik Io a ni," a ti.