PUC-ah Winter School ṭan a ni

Pachhunga University College (PUC)-a Chemistry leh Geology department-te chuan nimin khan PUC Seminar Hall-ah Winter School 2019 an buatsaih ṭan a, Mizoram Youth Commission (MYC) chairman Dr Vanlalṭanpuia'n a hawng.

Chawlh kar khat chhung awh tur Winter School hi B.Sc. zirlaite puala buatsaih a ni a, nimina a hawnna inkhawmah hian PUC principal Dr Tawnenga chu khualzahawm niin, Cambridge University, United Kingdom-a post doctoral ti mek Dr Lalṭhazuala Rokhum pawhin a hmanpui.

Dr Vanlalṭanpuia chuan, central service lama lut thei turin zirna kalphung leh kalhmang siamṭhat a ngaih thu sawiin, Mizote'n Delhi lamte an el phâk tawh loa sawi a nih thu a sawi. Dr Tawnenga chuan, PUC-ah post gra­duate course pathum awm mek pathum bakah, pahnih dang - Geophysics leh Statistics-ah hawn thar a nih dawn thu a sawi a ni.

Winter School hi DBT Star College bul­tuma neih a ni a; subject chi hrang hrang - entrepreneurship, career awareness, research methodology, disaster management, banking sector leh life skill development-ah te mithiam, ram chhung leh páwn aṭanga kalte'n an zirtir ṭhin dawn a ni.