Lokayukta-in thubuai 58 chingfel tawh

Mizoram Lokayukta chairperson Lalmalsawma chuan nimin khan Governor Gen. Dr Vijay Kumar Singh hnenah Mizoram Lokayukta Sixth Annual Report 2024-25 a thehlut. Lokayukta-ah hian eiruk thubuai 91 ziah luh tawh niin, thubuai 58 chinfel a ni tawh.

Mizoram Lokayukta Act, 2014 Section 47-in a phût angin Governor hnenah hian Lokayukta report thehluh a ni a; report hian April 1, 2024 leh March 31, 2025 inkar a huam a, Mizoram Legislative Assembly ṭhutkhawmah pharh a ni ang.

Lokayukta report-a tarlan danin, kum 2024-25 chhung khan Mizoram Lokayukta hnuaiah eiruk thubuai 20 ziah luh a ni a, chu'ng zinga paruk chu preliminary inquiry tih tura thawn a ni. Preliminary inquiry report pariat dawn a ni a, thubuai panga chinfel niin, thubuai pakhatah mi pahnih thiam loh chantir an ni.

Mizoram Lokayukta hi March 2019-ah din ṭan a ni a; din a nih aṭanga nimin (January 8) thleng khan eiruk thubuai 91 ziah luh tawh niin, thubuai 58 chinfel a ni tawh a, preliminary inquiry leh investigation kalpui mek 33 a awm bawk.

Eiruk thubuai hi engtik lai pawhin a thlawnin Mizoram Lokayukta office (MINECO)-ah lehkhaa ziakin emaw, Mizoram.lokayukta@mizoram.gov.in ah emaw thlen theih a ni a; mahni nihna tilang duh lote chu an nihna thup ṭhin a ni.