Ram tan theihtawp i chhuah zel ang u - B Lalchhanzova

Directorate of Information and Public Relations chuan nimin khan an auditorium-ah IPR officer-te leh MJA member-te pualin kum thar atana inhlan tharna leh thingpui inhona hun an buatsaih a; hun hmanpuitu IPR minister B Lalchhanzova chuan, ram tan theihtawp chhuah zel turin IPR officer-te leh thuthar thehdarhtute a chah.

B Lalchhanzova chuan, mipuite'n information dik leh ṭha an mamawh tih sawiin, IPR department leh MJA member-te chu mipui hnena thu dik hrilhtu ni zel turin a chah a, "Kan chunga thil thleng te, kan koa tlate hi theihtawp chhuahin bei zel mai ila, kan ram tan theihtawp i chhuah tlang zel ang u," a ti.

Social media-ah a thim zawng leh sawisel hrim hrim zawnga thil sawi (comment) a tam thu sawiin Lalchhan-zova chuan, "Negative comment han pek nghal bawrh bawrhte hi kan insiam ṭhat a ngai a, heng karah hian chanchinbumite'n mipui hnenah hriatthiamna leh tih dan ṭha kan tuh a ngai," a ti a; media-a chhuak reng reng chu historical record a nih avangin journalist-te chu hnam thil pawimawh record vawngtu an nih thu a sawi.

IPR Minister chuan, democratic chu India ram lungphûm pawimawh ber pakhat a nih avangin democracy tungding tlattu nih tum zel turin MJA member-te a chah a, "Mipui zingah khawi laiah emaw nêkchêp an awm a nih chuan an tan remchanna siamsaktu nih a pawimawh," a ti.

B Lalchhanzova chuan, media-a thawkte chu journalist ethics leh principle te huaisen taka kengkawh zel tura chahin, "Hei hian social reform a thlen chhoh ngei ka beisei," a ti a; chîk zawk leh thûk zawka thil chhuia luhchilh turin press mite a fuih bawk.

IPR minister B Lalchhanzova hian Aizawl Press Club tuaihnûmna tura a ṭula hman atan MJA hnenah Rs 50,000 a pek tur thu a puang nghal a ni.

IPR director K Vanlalsangi kaihhruai inkhawmah hian IPR secretary Betsy Zothanpari Sailo chuan, khawtlang tana MJA member-te pawi-mawhzia a sawi a; Mizoram sorkarin MJA member-te tan press tour a buatsaih dawn tih sawiin, "IPR-in kan ruahmanna Finance lamin an lo hnâwl hnuah kan IPR Minister hmalakna avang liau liauin a hlawhtling leh thei a ni," a ti.

MJA president C Lalrambuatsaiha pawhin thu sawiin, tun hma aṭanga tun thlengin IPR leh MJA ten thawhhona ṭha tak an neih thu a sawi a; MJA member-te leh IPR-a thawkte chu an hna ṭheuhah leh mawhphurhna an koa tlaah phûr taka thawk zel turin a chah bawk.