HTE Minister hoin Synod hnena GAC building hlan dan tur sawiho

Higher & Technical Education minister Dr Vanlalthlana chu January 7, Nilaini khan a pisaah Mizoram Synod hruaitute nen an inkâwm a, inremna siam tawh anga Sikulpuikawna Aizawl College (GAC) building inhlan chungchang an sawiho. GAC builing chu Mizoram Synod hnena hlan thuai a nih theih nan thuneitu sang zawkah thlen an rêl.

Sorkar thuchhuah tarlan danin, kum 2019 khan Mizoram sorkar leh Mizoram Presbyterian Kohhran chuan inremna siamin, Sikulpuikawna Boys Primary School leh Boys Middle School building leh a ram chu Mizoram Synod kutah hlan a ni a, ram inhlan hian GAC building dinna ram a huam tel a ni.

Nimina ṭhutkhawmah hian GAC building inhlan dan tur chungchanga hma la tur leh inremna (agreement) duangtu tur Drafting Committee din a ni a; Higher & Technical Education Director chu convenor atan ruat a ni. Committee member atan HTE Under Secretary, GAC principal Lalbiakzuala, Synod executive secretary (i/c Education) Rev. Dr Rosiamliana Tochhawng leh Synod secretary (Jr) Upa C Lalduhoma ruat an ni.

GAC building chu Mizoram Synod hnenah hlan thuai a nih theih nan hun bituk a ni a, a hma thei ang bera sawiho leh a, sorkar leh kohhrana thuneitu sang zawka thlen vat ni se, an ti.