Minister hoin VB-G RAM zirho a ni

Nimin khan Rural Development minister Prof. Lalnilawma hoin a pisaah MGNREGA (ni 100 inhlawhna) thlaktu tur Vikshit Bharat - Guaranteed Rozgar & Ajeevika Mission (Gramin) Act 2025 (VB-G RAM G Act 2025) chungchang department hotute'n an zirho.

RD Minister chuan, VB-G RAM(G) Act chu December 21, 2025 khan sorkar laipuiin gazette hmangin a chhuah thu a sawi a, "State tinte chu anmahni state-te tan thla ruk chhunga scheme buatsaih tura tih an nih angin, Mizoramah pawh Rural Development hmalaknain ‘Mizoram VB – G RAM G Scheme 2026’ ruangam chu duan nghal a ni a, peihfel a ni tawh. Tun budget session lo awm turah he scheme hi Legislative Assembly-a pharh hman ngei a ni ang," a ti.

Zirhoinaa tarlan danin, VB-G RAM(G) hnuaiah chuan sorkar kum khat chhungin thingtlang mite hnenah ni 125 tal inhlawhna pek a ni dawn. MGNREGA hnuaia mipui inhlawhna (wage component), sorkar laipuiin 100% a tum ṭhin chu 90% a tum tawh dawn a, 10% chu state sorkarin a tum ang.

Sorkar kum khat chhunga mipui inhlawhna labour budget hmanga pek ṭhinte pawh normative allocation hmanga state tinah sum pek a ni tawh dawn a ni.

Thingtlang loneitute’n an buh tuh leh buh seng buai laia anmahni hnaa an inpumpek theih nan kum khatah ni 60 chhung tal VB-G RAM(G) hnuaia hna thawh tur chawlh a ni ang. VB-G RAM(G) hnuaia hnathawh tur reng reng chu Vikshit Gram Panchayat Plan-a thun vek a, block leh district-a pawm a nih hnuah state sorkarin pawm ve lehin, Viksit Bharat National Rural Infrastructure Stack-a thun luhte chauh hna thawh theih a ni ang.