Mitdel 30 velin sorkar hna an thawk tawh

Mizoram Blind Society (MBS) chuan World Braille Day (January 4, 2026) pualin thuchhuah an siam a; Mizoramah mitdel, zirna lama hlawhtling tawh mi 30 velin sorkar hna an thawk tawh tih an tarlang.

MBS chuan, kumin 2026-a mitdel hawrawp ní - World Braille Day pualin Mizorama mitdel zawng zawng bakah, anmahni enkawltu te, Mizoram sorkar hotute leh mipuite duhsakna chibai an bûk tih an tarlang a, "Tunah hian mitdel zirna lama hlawhtling tawh mi 30 velin sorkar hna thawk tawhin, chhungkua an châwm mek a ni," an ti.

MBS tarlan danin, Mizorama mitdel sikul hmasa ber chu April 15, 1977 khan Salvation Army-in Kolasib-ah an din. Tunah hian mitdel sikul pahnih - The Salvation Army Integrated English Medium School for the Blind, Kolasib leh Special Blind School, Durtlang te a awm mek.

Mizoramah braille hmanga lehkha zir mitdel 20-in BA zo tawhin, mi 10-in MA an zo tawh a, mi pahnihin M.Phil. an zo tawh. Mitdel pariatin B.Ed. zo tawhin, mi pahnihin M.Ed. an zo tawh a; BA, B.Ed. leh MA zir mek an awm nual bawk.

Mitdelte'n braille hmanga lehkha an zirnaah syllabus hranpa a awm lo a, braile alphabet hmangin elementary aṭanga post graduate leh a dangte chu mitvar pangngaite zir ang vek an zir a; college leh university-ah chuan mitvar zingah class an kal ṭhin.

Tun hma chuan mitdelte tan lehkha zir a harsain a hautak hle ṭhin tih sawiin MBS chuam, "Tunah chuan Mizoram sorkara SCERT leh MBSE hmalakna zarah elementary aṭanga higher secondary thlengin mitdel hawrawpin school textbook print vek a ni tawh a, Social Welfare, Tribal Affairs, Woman and Child Development hmalakna zarah Mizoramah mitdel hawrawp chhutna (braille press) pawh a awm tawh. Hengte hian Mizorama mitdel zirlaite tan hmasawnna tam tak a pe a ni," an ti.

France mi mitdel Louis Braille chuan French ṭawnga mitdel hawrawp braille hmanga a siam chu kum 1829-ah a tichuak a, kum 1854-ah France sorkarin a pawm. Louis Braille-a pian champha January 4 chu World Braille Day atan hman a ni.