Inbumna leh Rs 5,00,000 inchhuhsak vangin police 3 leh mi dang 2 man an ni

December 29, 2025: Mizoram Police chuan gelatine leh a tihpuahna (detonator) hmanga inbumna vangin police pathum leh an thurualpui civil mi pahnih an man.

Aizawl SP Zosangliana sawi danin, 19.12.2025 khan Aizawl PS OC-in Aizawl Police Station-a sub-inspector Lalpianpuii hnen atanga Enquiry Report a dawn bawhzuiin Aizawl PS-ah BNS 61(2)/308(2)/319(2)/62/3(5) tlawhchhanin case no.561/25 Dt. 19.12.2025 ziah luh a ni.

Enquiry Report-a a lan danin, Aizawl PS-in Z Lalchhuansanga s/o Ngunawrha, Sangau, Lawngtlai district hnen atangin ziakin complaint an dawng a ni. Complaint-a a inziah dan chuan, Z Lalchhuansanga leh a thiante pahnih - Romalsawma leh Vanhleia te chu 17.11.2025 zanah Sangau atangin HC Lalrinkimi, ITI Veng, Aizawl hnen atanga detonator lei turin Aizawlah an kal a, HC Lalrinkimi chu an thlen chilh a ni.

18.11.2025 zan tir lamah Z Lalchhuansanga leh a thiante pahnih bakah, HC Lalrinkimi leh a thiannu Lalngaihzuali te chu lirthei (Sumo)-in detonator lei turin inpekna tura an ruat sa Ramthar Veng Chite kaiah an kal a; detonator kawltu Lalrinchhani pawh taxi-in a lo thleng chawpchilh ve nghal a ni. HC Lalrinkimi chuan detonator endik turin rucksack-a Rs 5,00,000 ak chungin taxi a pan a, Lalrinchhani chuan detonator sample a lo phawrh a, a bak chu báwmah awm thu a lo hrilh a ni.

Chutih lai tak chuan mipa pali hmai tuam, CID mi nia inchhálte rawn thlengin, taxi chu an hual nghal a, Rs 5,00,000 leh detonator-te chu an chhuhsak nghal a ni.

He thil thleng hi Police-te'n an chhuinaah, meth lem hralh tum leh police nia insawia mi bumtua puh police an lo man tawh police-te an inhnamhnawih tih an hmu chhuak a ni.

Police-te chuan mi 5 an man a, thu zawhfiah an nih hnuah Court phalnain jail-ah dah luh an ni. Mi 5-te hi bail-in an chhuak tawh nia thu dawn a ni bawk.

Aizawl SP Zosangliana chuan, meth leh detonator hmanga inbumna leh mi pawisa inchhuhsakna thubuaia Police mi leh sa inhnamhnawihte chu police an nih avangin thup tumna emaw, hum tumna emaw, thubuai tihnêp tumna emaw a awm loh thu a sawi a, "Case-a inhnamhnawih police mi leh sate hi criminal case an awrh mai bakah, na taka hrem an nih theih nan Departmental Proceedings kalpui )in uluk taka chhui zui an ni a, suspend tawh an ni," a ti.

POLICE-IN AN MANTE:

1. Constable RL Remlalnghaka (28) s/o Lalnuntluanga, Khanpui (PA Zemabawk North).

2. Constable Alex Lalnunfela (26) s/o C Lalsangzuala, New Capital Complex

3. Constable Andrew Lalremruata (29) s/o K Zothankhuma, Chanmari, Aizawl.

4. Krosshlupuii (37) d/o Kawlnithanga, Hunthar Veng.

5. Lalrinchhani (38) d/o Lalfakzuala, Lunglei Electric Veng.