Champhai kawng zauh mek NGO-te'n an enfiah

 Champhai NGO Coordination Committee hruaitute leh MJA, Champhai District hruaitute chuan vawiin Dec. 27 chhun khan Champhai luhka, Khankawn atanga Kanan Veng inkar kawng laih zauh mek a hmunah an enfiah.

Kawngpui zauh tur hi km. 3.670-a thui a ni a, metre 7-a zau tura laih zauh tur a ni. Kawngpui sira ram neitu mi thenkhatin compensation an beisei a, chutih laiin, hna thawhna tura SASCI atanga cheng vbc 12 ruamanah zangnadawmna pek tur a tel loh avangin kawng enkawltu Mizoram PWD-in harsatna an tawk mek. Kawng laitu contractor chu Road Develop Private Limited, Guwahati an ni.

Champhai NGOCC chairman Lalnunmawia chuan, Khankawn atanga Champhai khaw chhung luhna kawngpui zauh tur chu a rang thei anga siam zawh an duh thu leh, kawngpui kama awmte'n harsatna siam loin, PWD nen inrem thuai se an duh thu a sawi.

Kawngpui hi Khankawn atanga metre 350-a thui chu khawl hmangin laih zau mek a ni a, helai hmun hi Zirlianthanga chuan zangnadawmna phût loin a ram laih a phalsak.

Hetihlai hian, Khankawn - Thlangtlak Mual - Falkawn to Hmunhmeltha ram - Zote, Ring Road sial thar mekah Vengsang leh Hmunhmeltha rama hmun/ lo /ram neitute (mi pakhat tih loh) chuan zangnadawmna phû loin an ramah kawng sial tlang an phal a, lawmawm an tih thu Champhai NGOCC hruaitute chuan an sawi.