Krismas laiin khualzin an tam

Kumin Krismas vuakvetah Aizawlah hnam dang khualzin (tourist) kum dang zawng aiin an tam a, vawiin December 26-a Krismas lawmna ruaithehah pawh hnam dang hmuh tur eng emaw zat an awm.

Tourism Department hotute hnena aṭanga thu dawn danin, kumin November thla chawhnu lam aṭang khan Aizawl leh a chhehvela hotel leh homestay tam zawk chu a khat reng a, Krismas hma deuh khan homestay neitute chu mikhual thleng thei an awm leh awm loh an inzawt kual nasa hle.

Krismas ni khan Aizawla kohhran hrang hrang biak inah hnam khualzin hmuh tur an awm nawk a, kohhran ṭhenkhat chuan biak-ina inkhawmah hnam dang inkhawm vete pualin inlawmna thu (greetings) an sawi chhuak a ni.

Vawiina Krismas lawmna ruaiṭhehah pawh Aizawl veng hrang hrangah hnam dang ruai ṭheh hmuh tur eng emaw zat an awm a, thingtlang lamah pawh hmuh tur an awm nual. Vanglaini palai zawhna chhangin veng pakhat ruai ṭhehtu hnam dang nupa chuan, an thlenna hotel atanga veng hnai berah ruai an ṭheh ve thu leh, ruai an ṭhehna hmunah chuan Mizo ṭhian/hmelhriat sa an neih lem loh thu an sawi a, Krismas ruaiṭheh chu nuam an tih thu an sawi bawk.

Tourism Dept hotute sawi danin, khualzinte hian vawiin vek khan Aizawl leh a chhehvel khualzin tlawh ṭhin hmun hrang hrang an tlawh bawk. Reiek tlang, Sakawrhmuituai tlang, Hangi Lunglen tlang leh Solomon Temple te chu tlawh hlawh zualte an ni.

Tourism Department hian sorkar laipuia Ministry of Tourism nen khualzin hîpna turin December 15-20 khan Lammualah Winter Festival an buatsaih tawh a, December 23 khan Aizawlah Christmas Parade an buatsaih. December 31 hian tlai ni tla tur thlir pahin rimawi nena intihhlimna Sakawrhmuituai Sunset an buatsaih dawn a; kum thar January 6&7 khian Phuaibuang Tlaizawng Paradise an buatsaih dawn. January 6-ah Tuivai luiah nghakuai chiah runpui an buatsaih ang a, Phuaibuangah adventure tourism lam hawi program leh rimawi nen hun hman a ni bawk ang.