YMA, Police leh Excise ten ruihhlo doin an hnatlang

Police leh Excise & Narcotics Department mi leh sate leh Central YMA leh Aizawla YMA branch thenkhat hruaitute chu vawiin December 24 khan Aizawlah ruihhlo do nan an hnatlang a, ruihhlo ngai mi 100 chuang an khâwm.

Ruihhlo dona hnatlang hi 'Operation Chhandamna' tih a ni a, zing dar 5-ah tan a ni. Hnatlanga thawk chhuakte hi hmun hrang hrangah an insem darh a, ruihhlo ngai, riahna mumal nei lo leh Aizawl khawlai hmun remchanga riak thin mi 100 chuang an khawm a ni.

Ruihhlo ngai an khâwm zinga mi 68 (mipa 42 leh hmeichhia 26)-te chu Tawngtai Bethel Camping Centre (TBCC)-ah dah luh an ni.

Hnatlanga thawk chhuakte hi Aizawl SP Zosangliana leh CYMA president R Lalngheta ten an ho a; Home ministee K Sapdanga leh MLA Lalmuanpuia Punte ten an tawiawm bawk.

Home Minister chuan, ruihhlo ngai, riahna mumal nei loa khawlaia riak thinte hruai khawm a, TBCC-a dah tura CYMA-in hma a la chu lawmawm a tih thu a sawi a; home-a dah luhnaa a tula hman atan Rs 1,00,000 a hlan nghal a ni.