Hunpui atan kan inpeih tawh - PHE Minister
PHE minister Prof. Lalnilawma hoin a pisaah nimin khan hunpui thleng tura inbuatsaihna atan Aizawl khawpui tui dinhmun thlirho a ni a; Minister chuan, hunpui atan PHE department chu an inpeih tawh thu a sawi.
PHE Minister chuan, Krismas leh kumthar thleng turah mipuite’n tuiah harsatna an tawh lohna turin PHE department-in theihtawp an chhuah thu a sawi a, "Tun dinhmunah Aizawl khawpui hmar lam kohhran hrang hrang 208-ah leh chhim lam kohhran hrang hrang 138-ah Krismas atan tui pek a nih tawh," a ti.
Hunpui atan PHE department an inpeih tawh thu sawiin Prof. Lalnilawma chuan, "Rokhawlhna lian a thlengte a nih loh chuan mipuite’n tui hnianghnâr tak an nei thei ngeiin kan ring," a ti a; hlim tak leh thlamuang taka Krismas leh kum thar hmang turin mipuite duhsakna a hlan.
Thlirhona hunah hian PHE engineer-te chuan an bial chhung dinhmun, an harsatna tawh leh an hmalakna hrang hrangte an tarlang a ni.
AIZAWLA TUI DINHMUN
→ Aizawlah tui connection 85,792 a awm mek. Connection hi thla khatah 200-250 velin a pun belh zel ang a ni.
→ Ni tin consumer 8,000 - 11,000 inkar tui pek ṭhin a ni a, chawhrualin, mi pakhatin ni tin tui litre 68 - 70 dawng ang an ni.
→ Aizawl tui sem hna hi division pahnih - Aizawl Water Distribution Division North leh Aizawl Water Distribution Division South ten Aizawl hmar lam leh chhim lam an enkawl. North-in tui connection 50,159 an enkawl a, South-in connection 35,633 an enkawl.
→ Ni tina Aizawlin tui a mamawh zat chu litre nuai 350-400 a ni.
→ Aizawl châwm turin Greater Aizawl Water Supply Scheme Phase I-in ni khatah tui litre nuai 90 a pump chhuak ṭhin a, GAWSS Phase II-in ni khatah tui litre nuai 190 a pump chhuak ṭhin.
→ GAWSS Phase-III (37 MLD) pipeline Vaivakawn Zohnuaia chhia chu siam ṭhat a ni a, November 7, 2025 aṭangin ni tin tui litre nuai 90 pump chhuah ṭhin a ni.
→ GAWSS phase pathum aṭanga ni tina tui pump chhuah ṭhin zat chu litre nuai 370 a ni.
→ AWDD North hnuaia veng tam zawkah thla khatah tui vawi 3 sem ṭhin a ni. Veng ṭhenkhat Section-6 huam chhunga mi - Durtlang, Zemabawk, Ṭhuampui, Chaltlang, Falkland, Zuangtui, Ainawn Veng, Bawngkawnah te thla khatah tui vawi 2 sem chhuah hman a ni.
→ AWDD South hnuaiah hian thla khatah tui vawi 3 sem theih deuh vek a ni a, sem theih lohna veng tlemte a awm.
→ Tui pût leh bothlau turte venna tura siam Tui Leak Reporter Apps ṭangkai taka hman zel a ni a, nimin thlengin report 404 dawn tawh a ni.