MJA-in damdawi-inah ṭanpuina a hlân

Mizoram Journalists' Association Gen. Hqrs chuan nimin khan Civil Hospital, Aizawl leh Mizoram State Cancer Institute-ah MJA Charity Fund-a pawisa an thawh khawmte an hlân.

MJA hian Krismas dawn apiangin mi harsate ṭanpui nan Charity Fund an thawh khawm ṭhin a, kuminah hian MJA member 87 leh an member ni lo, MJA duhsaktu mi 19-in Rs 1,20,000 an thawh khawm. Civil Hospital, Aizawl Poor Fund atan Rs 50,000 an pe a, Cancer Hospital Poor Fund atan Rs 70,000 an pe a ni.

Civil Hospital, Aizawl (CHA) Senior Medical Superintendent pisaa Charity Fund hlannaah MJA president C Lalrambuatsaiha chuan, CHA chu Mizoram mipui nâwlpui, hmun hrang hranga mite'n an pan khawm, khawsak harsa zawkte'n an pan ber a nih thu a sawi a, "He damdawi-in pantute zingah mi harsa tak tak an awm ṭhin a, chung mite chu damdawi-ina thawkte'n damdawi leinate an tumsak ṭhin tih kan hria a, mi harsate ṭanpuina atan kan rawn thawh ve a ni," a ti.

CHA senior medical superintendent Dr Lalchhuankimi chuan, MJA nen thawhhona ṭha tak an nei leh CHA an duhsak ṭhin chu an lawm thu a sawi. CHA hotute chuan, Mizoram Universal Healthcare Scheme awm tawh mah se, inziak lut lo leh hmang phâk lo tam tak an awm thu te, Poor Fund aṭangin damdawi leh ṭul hrang hrang an leisak ṭhin thute an sawi bawk.

Mizoram State Cancer Institute (MSCI) nursing superintendent pisaa Charity Fund hlannaah nursing superintendent Lalthangpuii Pautu chuan, MSCI chu cancer veite'n an pan khawm a nih thu a sawi a, "Cancer hi inenkawl a hautak a, MUHCS-in a huam loh leh daih tam tak a awm. Damlo zingah khawsak harsa tak tak an awm ṭhin avangin mi inphalte sum thawh khawm hmanga inenkawl ve ṭâwk ṭâwk an awm ṭhin," a ti.