Serchhip YMA-in hâlpuah khapna thupek zâwm turin YMA member-te a ngen

Serchhip Sub-Headquarters YMA chuan an huam chhunga YMA group leh branch-te hnenah lehkha thawnin, sorkarin halpuah leh halmawi khapna thupek a chhuah chu zâwm ṭheuh turin YMA member-te a ngen.

Halpuah leh halmawi te chu mipuiin hlimpui viau ṭhin mah se, mihring hriselna tichhetu a nih thu tarlangin Serchhip Sub-Hqrs YMA chuan, "Boruak a tihbawlhhlawh bakah, damlo na tuar leh natna benvawn neite tana harsatna tam tak a siam ṭhin," an ti.

Serchhip Sub Hqrs YMA chuan, "Sorkar chuan hunpui thlen dawnah halpuah leh halmawi khapna thupek a chhuah ṭhin a, kuminah pawh khapna thupek tihchhuah a nih tawh thu tarlangin, "Sorkar thuchhuahte hi zâwm ṭheuh turin YMA member zawng zawng kan ngen a ni," an ti a; halpuah leh halmawi tel loa hlim taka hunpui hmang turin YMA member-te an sáwm.

YMA branch-te chu an huam chhung ṭheuhah sorkar tha tichaka thawhpuitu ni a, sorkarin halpuah leh halmawi kawl, zawrh, hman leh hâl a khapna thupek a hlawhtlin theih nana hma la theuh turin an ngen a; Krismas leh kumthar hlim taka hmang turin YMA member-te duhsakna an hlan bawk.