AYUSH Health Camp buatsaih a ni

Integrated AYUSH Hospital, Thenzawl chuan nimin khan Leite, Rotlang East, Dâwn, Rálvàwng leh Hlûmtê-ah te ‘AYUSH Health Camp’ an buatsaih a; Lunglei East bialtu MLA Lalrinpuii, Health minister-in Leite khuaah a hawng.

Lalrinpuii chuan, AYUSH chu India rama natna enkawl dan hrang hrang (system of medicine) khaikhawmna a nih thu a sawi a, "Hengte hi India ram chhûlchhuak leh Germany chhuak (homeopathy), India-in a lo seng luhte an ni. AYUSH hi Ayurveda, Yoga, Unani, Siddha leh Homoeopathy hming bul ṭheuh lak a, phuah chhuah a ni," a ti.

Health Minister chuan, community health centre hrang hrang te, primary health centre ṭhenkhat leh AYUSH Directorate-in a enkawl health & wellness centre-ah te AYUSH doctor-te ràwn theih reng an nih thu a sawi a, "AYUSH damdawite damlo hnenah a thlawna pek an ni ṭhin a ni," a ti a; Integrated AYUSH Hospital, Thenzawlah natna hrang hrang OPD leh IPD ah enkawl an nih ṭhin thu a sawi.

'Hriselna hi hausakna sumin a lei theih loh a ni' tih a nih thu sawiin Lalrinpuii chuan, "AYUSH-in a tum ber chu tihdam aiin inven a ṭha zawk tih hi a ni. Kan lo hrisel zawk nan kan taksa enkawl ṭha ila, natna kan lo nei a nih pawhin, a nasat hmain doctor-te i râwn vat ṭhin ang u," a ti.