Kumpuan 'Ruihhlo Do' hawng

YMA kumpuan 'Ruihhlo do' chu Saitual Sub-Hqrs YMA chhung bika kalpui turin December 16, Thawhlehni zan khan Keifang Venghlun YMA Zawlbukah Central YMA general secretary Prof. Malsawmliana'n a hawng.

Prof. Malsawmliana chuan, Mizoramah ruihhlo hman sual a tam thu sawiin, "Kumin bikah ruihhlo vanga thi mi 80 chuang an awm tawh. Ruihhlo do turin YMA lo chu kan awm chuang lo. Ruihhlo do kan puannaah hian haw hawa nawr chi a ni lo a, fimkhur a ngai a, dan hnuaiah kan do a ngai," a ti.

Ruihhlo donaah ruihhlo ngaite chauh en bik loin, ruihhloa sumdawngte leh inhnamhnawihte kan hmachhawn a ṭul thu sawiin CYMA General Secretary chuan, "Ruihhlo lakah indo kan puang a, ruihhlo do tur hian rinawmna, inpekna, huaisenna, thawhhona ṭha te a pawimawh," a ti a; kohhran leh pawl dangte pawhin nasa zawka hma an lak a, YMA nen thawhhona ṭha zawk an neih a ngaih thu a sawi.