CS-in an hnathawh turah ruahmanna fel tak siam turin department-te a chah

Chief secretary Khilli Ram Meena chuan nimin khan Lunglei a tlawh a, DC conference hall-ah head of office-te nen inkâwmin, sorkar department hrang hrangte chu an hnathawh turah ruahmanna fel tak siam turin a chah.

Khili Ram Meena chuan, sorkar laipui duh dan anga ram mipui mamawh ngaihtuahna leh hmasawnna hna thawh hrang hrangah tih turte hlen a nih theih nan ruahmanna kimchang leh felfai tak a awm a ṭul thu a sawi a; department hrang hrangte chu an hnathawh turah leh mipui rawng an bawlna kawngah ruahmanna fel tak siam turin a chah a ni.

DAJGUA hnuaia scheme 17 kaltlanga hmasawnna tluantling a awm theih nana hmalaknaah mamawh bulpui hmasa pahnih - inkalpawhna kawng ṭha leh inbiakpawhna internet ṭha a awm theih nan ruahmanna siam turin district thuneitute chahin Chief Secretary chuan, "Khaw tin leh mi tin thleng phak ruahmanna leh hmasawnna a awm a pawimawh," a ti.

Chief Secretary chuan chuan, hriselna, zirna leh nun khawchhuahna atana khua leh tuite mamawh hrang hrang a nih dan tur taka a hun taka pe thei turin department-te a chah a; ruahmanna fel tak a awm chuan sorkar hmalakna hrang hrangah hmasawnna tluantling leh hlawhtling zawk a awm theih tur thu a sawi.

Lunglei bawrhsap Navneet Mann chuan Lunglei district dinhmun tlangpui a sawi a, "June 15 - July 30, 2025 chhung khan DAJGUA Awareness & Benefit Saturation Campaign kalpuiah Lunglei district-a khaw 48-ah campaign 180 chuang buatsaih a ni. Aadi Karmayogi Abhiyan hnuaiah khaw thlan bik 48-ah khawtlang hmasawnna tur ruahmanna 'Village Action Plan' duan a ni tawh," a ti.

Inkawmnaah hian Urban Development & Poverty Alleviation, Land Revenue & Settlement, Health & Family Welfare, Public Health Engineering, Commerce & Industries, Power & Electricity, School Education leh Sanik Welfare & Resettlement department hotute'n an department hmalaknate an tarlang a; harsatna leh mamawh an neihte an sawi bawk.

Chief Secretary hian Pukpuia AYUSH Health & Wellness Centre leh Anganwadi Centre-I te tlawhin, an dinhmun a enfiah. AHWC-ah hian thawktute'n damdawi-in dinhmun leh damlo an enkawl dante lo hrilhin, harsatna leh mamawh an neihte an lo thlen.