Tuipui South-ah Fish Festival ṭan a ni

Nimin khan South Tuipui (Chhimtuipui lui)-ah Fish Festival ṭan a ni a; Fisheries minister Lalthansanga, bialtu MLA Jeje Lalpekhlua leh MLA dang Dr Lorrain Lalpekliana Chinzah leh T Lalhlimpuia ten an hmanpui.

Fish Festival hi Tuipui South khua leh Fisheries department huaihawt a ni a, December 19, Zirtawpni thleng neih a ni dawn. Festival chhungin Chhimtuipui luiah nghakuai chiah theih a ni a, chawhma leh chawhnuah chiah hun siam a ni. Ni khatna leh ni ni hnihnaah ticket man Rs 3,000 a ni a, ni thumnaah chawhmaah Rs 2,000 man leh chawhnuah Rs 500 man a ni.

Fisheries Minister chuan, Fish Festival chu Tuipui South leh a chhehvel Hnahthial district-a mite tan chauh ni loin, Mizoram pum ui tan thil chhuanawm a nih thu a sawi a, "Tuipui khua hian kum 30 chuang sangha humhalhin an lo enkawl tawh a, an fakawm a, kan Mizo nunphung, kan rama nungchate kan hmangaihzia tichiangtu a ni," a ti.

Mizoramah lui tui a kam tial tial a, luia nungchate pawh a tlem tial tial tih sawiin, Lalthansanga chuan, "Tuipui South khaw mipuite'n Tuipui lui humhalha an lo venghim hi a lawmawm. Nunphung thilsiamte zahna, mipui inpumkhatna leh hun lo kal zel tur ngaihtuaha kan tu leh fate tana lui leh a chhunga chengte humhalh thaṭzia a tilang chiang hle a ni," a ti a; Fish Festival chu rahbi thar kaina leh inpumkhatna tinghettu ni se a duh thu a sawi.

Bialtu MLA Jeje Lalpekhlua chuan, Chhimtuipui luia sangha hlawhtling taka humhalh a nih theihna tura khawtlang inlungrualna chu ropui a tih thu a sawi a, "Sorkarin theihtawp chhuahin kan luite min enkawlpui a, kan zavaia thawhhona avanga hengte hi hlawhtling thei a ni," a ti.

Jeje Lalpekhlua chuan, chief minister Lalduhoma kaihhruaina hnuaiah kum hnih chhungin hlawhtlinna tam tak a awm tih sawiin, "Huau huau hmang nasa titein min sawisel a ni. Nuam tâwl satliah tur kan ni lo a, khawtlang mipuite'n a hlâwkna a tam thei ang ber an têl hi kan duh ber a ni. Ram changkang leh nuam kan tih chu khualzinte'n tlawh nuam an tih apiang hi a ni thin," a ti a; Mizoram leh leilung hausaknate a tam thei ang ber khawvel mithmuha tarlan a ṭul thu a sawi.