KHAWTHLIR

Ṭanpuina hlan

Lunglei Police (District Executive Force)-a thawkte chuan Krismas puala an thawh khawm Rs 1,47,660 chu ṭanpuina atan an sem. An thawhpui chhungte damlo pasarih hnenah Rs 10,000 ṭheuh, Bethel Centre leh Rescue Centre, Lunglei hnenah Rs 25,000 ve ve leh, TNT, Lunglei hnenah Rs 26,000 an hlan a ni.

END-in heroin man

Excise & Narcotics department chuan December 16, Thawhlehni tlai dar 5 khan LC Homestay, Falkland Vengah heroin gram 349 (hawng 210) an man a; a neitua puh mi pathum - Zorinsanga (32) s/o Lallianzuala, Lunglei Chanmari, Lalhmangaihsanga (39) s/o Hrangvunga (L), Bungkawn Vengthar leh, Bawihchhuanpiang (29) s/o Chawnirh (L), Falam, Myanmar-a khawsa mek nia inchhalte an man bawk. Mi pathum hi nimin khan court-ah hruai an ni.

Thilpek hlan

Minister Dr Vanlalthlana te nupa chuan December 16, Thawhlehni khan a bial Aizawl North-II chhunga upate hnenah Krismas thilpek an hlan. Thilpek hi kum 80-90 inkar mi 380 leh kum 90 aia upa mi 80 hnenah an pe a ni.

MLA-in pe

Aizawl East-II bialtu MLA B Lalchhanzova chuan nimin zing khan a bial chhung Tuithiang a tlawh a, Tuithiang Branch YMA hnenah badminton court carpet leina tur sum Rs 2,60,000 a pe. Tuithiang Zonu Unit hnenah Krismas inbuatsaihna atana veng chhung tihfaina tur Rs 1,00,000 leh hmeithai hnenah an in chung rangva tur bundle nga a pe bawk.

Speaker-in hawng

Mizoram Legislative Assembly speaker Lalbiakzama chuan Serchhip Sailiam hmuna Kawlni Filling Station chu nimin khan a hawng. Kawlni Filling Station (Bharat Petroleum Corporation Ltd) hi Lalnghinglova Kawlni, Serchhip ta niin, Serchhipa petrol pump pahnihna a ni a; hawnna inkhawmah hian Serchhip bawrhsap Paul L Khuma chu khualzahawm a ni.

Minister-in hlan

Minister Lalrinpuii chuan nimin khan a bial Lunglei East-a khaw ṭhenkhatah Krismas thilpek a hlan. Lalrinpuii hian Leite, Rotlang East, Rálvàwng leh Dâwn khuaa mi 10 ṭheuh leh, Maudarh leh Old Rálvàwng khuaa mi panga ve ve hnenah ṭanpuina thilpek a hlan a; Leite, Rotlang East, Ralvawng leh Dawn khuaah volleyball leh net a pe bawk.

Chief architech-ah kai

PWD-a superintending architech Lalengzuali chu chief architech-ah a kai sang. Kaisanna tur hian MPSC-in rawtna a siam hnuah PWD-in hriattirna a chhuah a ni.