India ram huap inelnaah kan taimakna leh tumruhna hian min la hruai thleng pha lo - CM

Serchhip College chuan nimin khan an hmunah Winter cum Cultural Fest vawi lina an buatsaih a, chief minister Lalduhoma'n a hawng. CM chuan, ram pum huap inelnaa Mizote an lan hleih theih loh chhan chu taimakna leh tumruhnain a phak loh vang a nih thu a sawi.

Chief Minister chuan, May 2025-ah Mizoram chu fully literate state-ah puan a nih thu sawiin, "India rama a hmasa ber kan ni. Amaherawhchu, India ram huap inelna hrang hrangah hnam dangte kan pha lo hle. A chhan ber chu, national exam-ah kan tribal-puite kan tluk loh vang a ni. Hna hi chu a awm a, ST quota pawh kan hnawh khat zo ngai meuh lo. Kan taihmakna leh tumruhna hian min hruai thleng phâk ṭhin lo a ni," a ti.

ZPM sorkarin sorkar hna thawk tur sâng tél an la tawh tih sawiin Lalduhoma chuan, "A tling leh tlakte fair takin an lut ṭhin," a ti a; sorkarin mi taima leh thawkrimte tana hmasawn theihna kawng zau takin a sial tih sawiin, chung atan chuan ṭha taka inbuatsaih turin college zirlaite a chah.

CM Lalduhoma chuan, Mizoram State University kalpui thuai a nih dawn thu leh Mizoram Engineering College, Lunglei chu 2026-ah zirna ṭan tum a nih thu a sawi a, "Ruihhlo nasa takin kan nawr tawm a, ṭhalai ngawlvei tam tak kan chhanchhuak a, eizawnna khawp thiamna an neih theih nan skill training kan pe," a ti.

Thlai pangaah sorkarin support price a pek thu sawiin Lalduhoma chuan, "Pa taima leh nu taima chuan sum an la lut awk awk mai a ni," a ti a; mahni kea din tuma hma la, pawm tlak project neite hnenah a pung awm lo leh dahkham ngai loin Bána Kaih loan an pek thu a sawi.

Chief Minister chuan, Serchhip College chu NAAC Grade A nei mek a nih thu sawiin, "Grade sang zawk hmu tura ṭan lak zel a ṭul avangin vantlang tana fest changtlung tak neih hi a ṭha... Kawng hnihin college activity lamah kan hlâwkpui dawn a ni," a ti. CM hian Fest puala auhla inphuahsiaka ti ṭhate hnenah lawmman a hlan a ni.

Serchhip College principal C Laldintluanga chuan, zirlaite'n Fest an buatsaih chuan kut themthiamna lamah a ṭanpui nasa tih an hmuh avangin Fest buatsaih a nih thu a sawi a; Organising secretary Dr Zarzosanga chuan, Fest atan budget Rs 5,60,000 an siam thu a sawi bawk.