Digital crop survey kalpui ṭha lawmman Agriculture dept-in cheng vbc 60 a dawng

Mizoram Agriculture & Farmers Welfare department chuan sorkar laipui aṭangin digital crop survey (DCS) kalpui ṭha lawmman cheng vbc 60 a dawng.

Agriculture minister PC Vanlalruata chuan nimin khan thuthar thehdarhtute hmaah DCS kalpui ṭha lawmman an dawn thu a sawi a, "India ram pumah state pakua velin an dawng a, hmarchhak state-ah chuan Assam leh Sikkim te nen kan dawng. Hnathawh ṭhat vanga state budget pawn lam aṭanga cheng vbc 60 lai kan dawng hi kan lawm tak zet," a ti.

Lawmman an dawn theih chhan chu department-a thawktute thawhrimna vang a nih thu sawiin Minister chuan, "Kan naute'n theihtawp an chhuah a, lo/huan ṭhenkhat chu motor pawha kal theih lohnate a ni a, chung hmunahte chuan kalin survey hna an thawk a ni," a ti a, department-a thawkte inpekna vang liau liaua award dawng thei an nih thu a sawi.

PC Vanlalruata chuan, Land Revenue & Settlement department pawh survey atan an ṭangkai thu sawiin, "Anni department pawhin theihtawp tak meuh min chhuahpui ṭhin," a ti.

Agriculture Minister sawi danin, DCS hi Kharif 2025 aṭangin ram puma kalpui tura tih a ni a; sorkar laipui chuan state hrang hrangte DCS kalpui ṭha lawmman cheng vbc 95 thleng dawn theih dan tur a duang a ni. Category chi thum a awm a, cheng vbc 50 dawn theihna Milestone-I (district tina khaw pakhata DCS kalpui)-ah Mizoramin lawmman a dawng.

Milestone-I phûtte chu Mizoram chuan a hun takah zoin, lawmman a dawng theih phah a; lawmman cheng vbc 50 bakah, additional-ah sorkar laipuiin vbc 10 a rawn pek belh bawk.

Cheng vbc 30 dawn theihna Milestone-II (district tina khaw awm zat aṭanga 25%-ah DCS kalpui) leh cheng vbc 15 dawn theihna Milestone-III (district tina khaw awm zat aṭanga 50%-ah DCS kalpui) erawh chu Mizoramin a la peih hman lo. Eng emaw chen kalpui a ni tawh a, heng aṭang pawh hian Mizoramin lawmman a dawn theih ngei beisei a ni.

Zawhna chhangin PC Vanlalruata chuan, an pawisa dawn chu Agriculture department tan bik a nih loh thu sawiin, "A hmanna tur chu Planning department lamin an ruahman ang. Hmanna tur bik sorkar laipuiin ruahman a nei lo a, state sorkarin a duhnaa a hman theih tura tih a ni," a ti.