Mara Girls Hostel lungphùm phúm

Chief minister Lalduhoma chuan nimin khan Zotlang, Aizawla Mara Boys Hostel-a Mara Girls Hostel sakna tur te, MADC area-a PMJVK hmanga sikul thar pariat sakna tur leh sikul awm sa paruk chei ṭhatna turte lungphùm a phúm. CM chuan, ZPM sorkarah hna muang, hna chhia leh a huna zawh lohte pumpelh tum a nih thu a sawi.

CM Lalduhoma chuan, lungphùm a phùmte chu Mizoram tana zirna lama hmasawnna a tlinga a hriat thu a sawi a, "A puitlin hunah chuan Mara zirlai 3,200-te'n ṭangkai takin an chhawr thei dawn. Kan sorkarah hian hna muang te, hna chhiate leh a huna zawh lohte hi pumpelh kan tum tlat a, hnathawh tinreng viltu tur Project Monitoring Committee kan nei a, vawiin thlengin project 87 an endik tawh. Vawiina a lung kan phùmte pawh hi ṭha taka kan thawh ngei theih nan an rawn vil dawn," a ti.

Hna thawhna tur sum petu Ministry of Minority Affairs chungah a lawm thu sawiin Lalduhoma chuan, "Delhi lama girls hostel pawh kan sorkar tirh aṭangin kan um zui nghal a, vawiina kan hmalaknate hian MADC kan ngaihthah lohzia leh hmeichhiate chawikanna kawnga hna kan thawhzia a tilangah kan ngai," a ti a; Mara ṭhalaite'n zirna an uar avangin zirnaah duhsak an phúa an hriat thu a sawi.

Inkhawmah hian Siaha bialtu MLA Dr K Beichhua pawhin thu a sawi a; MADC chief executive member M Laikaw pawhin online kaltlangin thu a sawi bawk.

Mara Girls Hostel hi khum 120 awm theihna tur niin, chhâwng ruk a ni dawn a, cheng vbc 8.07 sêngna tur a ni. Sikul building thar pariat hi cheng vbc 5.76 senga sak tur niin, building pakhatah pindan 12 zel awm tur a ni a; sikul paruk thuam thar hna chu cheng vbc 8.59 senga thawh tur a ni.