KHAWTHLIR

MCAB thilpek

Mizoram Cooperative Apex Bank chuan nimin khan home/centre ṭhenkhat hnenah Krismas thilpek an hlan. Aizawl leh a chhehvela ṭanpuina an pekte chu TNT-ah Rs 1,50,000, Operation Kingdom Ministry-ah Rs 50,000, Hermons Children Home-ah Rs 50,000 leh Cancer Khualbukah Rs 50,000 a ni a; district hrang hrangah branch kaltlangin Krismas thilpek an hlan bawk.

Minister-in hawng

Social Welfare minister Lalrinpuii chuan nimin khan Phunchawnga OKM Home (Rehabili-tation Centre & Homeless Shelter)-ah ‘Pangthianga Building’ a hawng. Building hi Lalengmawii Pachuau te chhungkuain anmahni sum sênga an sak a ni. Lalrinpuii hian nimin vêk khan Sinlung Hill Council hall-ah James Miahlung ziah, 'Shendu Lakher Chanchin' tih lehkhabu a tlangzarh bawk.

MLA-in hmanpui

Adviser to CM H Ginzalala, MLA chuan nimin khan a bial chhunga Hnahlan YMA Hall-ah Khadi and Village Industries Commission-in Honey Mission hnuaia a buatsaih Bee Keeping Awareness Programme a hmanpui. MLA hi n Hnahlan VC leh tlawmngai pawl hruaitute nen an inkâwm a; Farlui zau khuah dan tur te, Hnahlan leh Lailiphai kawng siam dan tur te, thei leh thlai hlâwk zawka hralh leh hman theih dan turte an sawiho a ni.

Lunglei Ni hman hun tur tichiang

Lunglei Municipal Council hnuaia 'Lunglei Ni' hman dan tur ngaihtuahtu Organising Committee chu December 15, Thawhṭanni khan an ṭhukhawm a, Lunglei Ni chu March 4, 2026-ah C Ṭhuamluaia Mualah hman an rêl. Lunglei din ṭan ni-ah hian mei mit loa Lunglei (Fort Lungleh) din ṭan ni, March 4, 1889 pawm a ni.

Security ṭanpuina

Superintendent of Police (Security)-a thawktute chuan Krismas puala mi dangte ṭanpui nan Rs 5,50,512 an thawh khawm a, nimin khan an sem chhuak. Krismas thilpek hi Aizawl leh a chhehvela chhungkaw 75, hnuchham enkawlna hmun pasarih leh SP Security staff damlo mi panga hnenah an hlan a ni.

Vawk khuahkhirh

Aizawl district magistrate Lalhriatpuia chuan thupek tichhuakin, African Swine Fever (ASF) a darh zel loh nan Aizawl district-ah hmun dang aṭanga vawk, vawksa leh vawksa aṭanga siam ei tur lak luh khap a nih thu a puang. Vawk hrisel ṭha chauh phurh kual phal a nih thu leh, ASF kai nia rinhlelh vawk damlo awmna khua/veng aṭangin vawk lak phal a nih loh thu a tarlang bawk.

MIS-te'n tlawh

Mizoram Information Service (MIS) officer, 2025 batch-te chuan December 15, Thawhṭanni khan Champhai district thlengin Information & Public Relations (IPR) department hnuaia district-a hnathawh dan leh kalhmang zir turin pisa hrang hrang an tlawh a, nimin khan Aizawlah an let leh.