MCU inkhawmpui Minister-in hmanpui

Mizoram Consumers’ Union (MCU) chuan nimin khan Central Hall, Venghluiah Annual General Meeting-cum-Consumer Awareness Campaign an hmang a, Food, Civil Supplies & Consumer Affairs (FCSCA) minister B Lalchhanzova'n a hmanpui.

B Lalchhanzova chuan, MCU hmalakna chu phungthlu taka hlen chhuah chi a nih loh thu a sawi a, "Hawihhâwm tak chunga thil ti dik lote hrem ngam a ṭul a, kan hnathawh hlutna hi mual êng kîl pha lo, sawisaktu nei ve lote'n a par zu an chhim pha tur a ni," a ti a; cosumer-te'n an chanvo dik tak an chan ṭhatna hmun Mizoram siam tum turin MCU member-te a chah.

Supply Minister chuan thil dik lo ngawihbopui lo turin mipui a chah a, "Thil dik lo ngawihbopui chìn hi mi dawihzepte awm dan a ni a, mi huaisen leh hawihhâwmte chuan thil dik lo hi an hmachhawn ngam ṭhin," a ti.

Inkhawmpui hi FCSCA director Saizikpuii pawhin a hmanpui a; MCU president Thanglura buatsaih 'Awareness on Consumer Protection Act and Liquefied Petroleum Gas (LPG)' tih leh general secretary H Lalbiakpuia buatsaih 'Consumer Awareness on Telecommunication' tihte zirho a ni.