National Painting Competition buatsaih

Mizoram State Council for Child Welfare (MSCCW) chuan nimin khan PC Girls' School-ah state level National Painting Competition 2025 an buatsaih a, zirlai 147 an tel.

Tun ṭuma intihsiakna hi vawi 16-na a ni a, PC Girls' School headmistress Lallianpuii'n hmanpuiin, lawmmante a sem. Zirlaite chu hlawm li-ah ṭhen an ni a; Green Group-ah kum 5-9 inkar, White Group-ah kum 10-16 inkar, Red Group-ah 11-18 inkar an awm a, vohbik naupangte tan Yellow Group siam a ni bawk.

Group tinah a ti ṭha naupang pang zel hnenah lawmman pawisa leh thuchei hlan a ni a; inelnaa tel zawng zawng hnenah lem ziahna hmanrua, ei leh in, participation certificate leh DA pek vek a ni.

Intihsiaka pakhatna aṭanga pathumna dawngtu lemziakte chu Indian Council for Child Welfare hnenah ram pum inelnaa tel turin thawn a ni dawn a; ram pum huapa lawmman dawng pha an awm a nih chuan lawmman dawng tura an kalna senso zawng zawng tumsak an nih dawn bakah, kum 18 an tlin thlengin scholarship pek an ni ang.

Lemziaka intihsiak hun hman zawhah hian naupangte tan intihhlimna hun hman a ni bawk a, naupangte'n an thiamthil chi hrang hrang an entir a ni.