Jordan Centre-ah sorkar a rálbáng dawn lo - Social Welfare Minister

Social Welfare, Women and Child Development minister Lalrinpuii chuan, Seṭhâwna ruihhlo ngaite enkawlna Jordan Centre chu Mizoram Synod-in enkawl dawn mah se, Mizoram sorkar a rálbàn bik dawn loh thu a sawi.

Lalrinpuii hian nimina a pisaa thuthar thehdarhtute a kawmnaah Jordan Centre chungchang a sawi a; Synod Inkhawmpuiin December 13, 2025 khan Jordan Centre enkawl a remti tih sawiin, "Synod hian

SEC-in a ṭul anga a bawhzui turin a dah zui nghal. Sorkar nen ṭha taka ṭangkawp a, hlawhtling taka kalpui a nih ngei ka beisei. Sorkar a ralbang dawn lo a, grant-in-aid a pe dawn a, hmanrua leh bungruate pawh Synod-in an chhawm nghal dawn," a ti.

Social Welfare Minister sawi danin, Jordan Centre chu public private partnership mode-a kalpui a fuh zawk dawna hriat a nih avangin June 18, 2024-a Council of Ministers ṭhukhawm chuan mi dang kuta hlan a rêl a; mahse, enkawl duh an awm loh avangin enkawl turin sorkarin Mizoram Synod a dawr a ni.

Lalrinpuii chuan, ruihhlo ngaite chhanchhuahna tura sorkar, kohhran leh tlawmngai pawlte'n an buatsaih Hulhliap Short Stay Centre (SSC) chu batch ruk buatsaih a niih tawh thu a sawi a, "Batch rukna thlengin mi 1,528 admit an ni a, mi 937 an awm tluan. Tun thlenga senso chu Rs 2,05,00,913 a ni a, Finance aṭanga sum kan hmuh tawh chu Rs 2,36,63,000 a ni," a ti a; March 2026 thleng kalpui tura ruahman a nih thu a sawi.

Social Welfare Minister chuan, ZPM sorkarin a duan, ruang phurh man a tumsakah September 1, 2024 aṭanga nimin thlengin ruang 1,680 phurh a nih tawh thu leh chuta tan chuan Rs 1,75,85,602 pek chhuah a nih tawh thu a sawi a, "Awlsam zawk nan ICT nen ṭangkawpin Ruangphurh app peih a ni tawh a, app hmang hian kum thar lam aṭang chuan online-in bill thehluh theih a ni ang," a ti.

Old Age Pension (tar pension) chungchangah Lalrinpuii chuan, Mizoram sorkarin a tum tur chu sum a awm reng a, sorkar laipuiin a tum tur a rawn pek theih loh avangin pek chhuah mai theih a nih loh thu a sawi a, "State contribution bik hi Krismas hma ngeia sem turin hma kan la mek," a ti.

Women & Child Development Minister chuan, 2011 chhiarpuiah Mizoramah khua 829 a awm laiin, anganwadi 2,244 a awm thu sawiin, "Anganwadi worker 2,244 kan nei a, worker zawng zawng hnenah kumin hian smart phone thar pek vek a ni," a ti. Kum 2024-25 chhungin anganwadi 1,600 chu Rs 1,00,000 zela tihchangtlun a nih thu te, DAJGUA aṭangin anganwadi thar 41 din phalna hmuh a nih thu te, anganwadi 97 sak ṭhat a nih thute a sawi bawk.