Tourism Minister-in Winter Festival a hawng

Tourism minister Lalnghinglova Hmar chuan December 15, Thawh-ṭanni zan khan Lammualah Winter Festival 2025 a hawng a; Tourism department-in kum 2026 atana calendar an siam a tlangzarh nghal.

Lalnghinglova Hmar chuan, kût (festival) chu Mizo mipui leh ṭhalaite hlim tak leh thianghlim taka an inhmuh khawmna tura buatsaih a nih thu a sawi a, "Khualzin kan hîp theihna tur te, keimahni kan intihphûr tawn a, kan ei leh in siam te, kan kutchhuak leh kan thil neih zawrh tur te kan hralh theihna hun remchang a nih bakah, kan ram mawina, boruak thianghlimte state dang mite leh khawvel hmun danga mite'n an hmuha an chhim ve theihna tura buatsaih a ni," a ti.

Winter Festival chu December 15-20, 2025 chhung hman phawt tur a nih thu sawiin Minister chuan, "December 23-ah Christmas Parade neiin ropui taka khâr a ni dawn. Parade hi India ram state dang mai ni lo, khawvel hmun dang aṭanga an rawn chhim ve theih nan hmalak zel a ni dawn," a ti. Christmas Parade hi Chanmari kawn aṭanga Lammual thleng neih tur a ni a, Krismas lam hawi thawmhnaw inbelin, rimawi leh zaithiamte nen kawng zawh tur a ni.

Tourism Minister chuan, Decem-ber 31-a Sakawrhmuituai tlanga ni tla thlirhona buatsaihah tel turin mipui a sáwm a, "Zaithiam hrang hrang zai ngaihthlak tur a awm dawn," a ti.

Winter Festival-ah hian sorkar department ṭhenkhat leh mimal sumdawngte'n stall an hawng a; stall-te hi Tourism Minister chuan a fang kual a ni.