Minister-in solar market shed a hawng

Rural Development & Administrative (RDA) minister Prof Lalnilawma chuan nimin khan a bial chhunga Seling leh Keifang bazarah solar market shed a hawng a, Mizorama solar market shed hmasa ber a ni.

Prof. Lalnilawma chuan, sorkarin khawtlang tan nizung hmang, project tluantling, kut hnathawktute tana ṭangkai turah hmalak zel a tum thu a sawi a, "SELCO Foundation leh MLA fund kaltlanga khawtlang tana ṭangkai tur, Mizorama solar market shed hmasa ber tur hawn theih a ni ta hi a lawmawm," a ti.

Chawhmeh zuartute'n chhun leh zanah nizung chakna hmangin êng an chhi thei tawh dawn tih sawiin RDA Minister chuan, "Bazarah zan rei tak tak thleng in ṭhu thei ang a, chu chuan in eizawnnaah a puih dawn cheu bakah, in sum lak luh pawh a pun ka beisei," a ti a; solar light-te chu dimdawi leh uluk taka enkawl turin a chah.

Bazar pahnihah hian nizung chakna hmanga êng pek a nih dawn bakah, nizung chakna hmang vekin hmaizah (fan) hman theih a ni dawn a ni.