IAF hnenah airport hlan kan tum lo - Lal Thanhawla

Indian Air Force (IAF) hnena Lengpui Airport hlan tuma chief minister Zoramthanga'n Congress kaihhruai sorkar a puh chungchangah chief minister hlui Lal Thanhawla chuan, "Air Force hnena hlan tumna kan nei lo," a ti.

Nmina Congress Bhavan hawnna inkhawmah Lal Thanhawla chuan, Mizoram Governor hlui MM Lakhera hun laiin IAF hnena Lengpui Airport hlan turin Governor-in a ziak tih sawiin, "Kan hriat veleh kan duh loh thu kan thlen. Air Marshal-te pawh an rawn kal a, defence strategy atan a pawimawh thu an rawn thlen. Thlawhtheihna ṭumhmun kan neih chhun a nih avangin kan pe thei lo a ni," a ti.

Thlawhtheihna service pangngai a tihbuai dawn loh chuan India ram venhimna atan IAF chu hman an remtihsak thu sawiin Lal Thanhawla chuan, "India venhimna atan a pawimawh avangin hnial chi a ni lo a, China laka ram venhimna atan jet fighter dahtir kan remti a ni zawk," a ti a; IAF kutat an pek loh bakah, pek an tum loh thu a sawi.

MPCC President chuan, Hmunpui tlanga DVOR dah tur Zoramthanga'n dah tuiêk hman nia a sawi chungchangah, "Khawl kha Port Blair aṭanga a chuha kan chuh chhuah a ni zawk. Hmunpui hi jeepable road chauh a nih avangin PMGSY hnuaiah kan thun a, kan sorkar tàwp lamah kan lai zau hman. Kawng laih zau a nih loh chuan khawl bun theih a ni lo," a ti.