Tourism-in cheng nuai 34,990.9 hû project a khawih mek - Tourism Minister

Tourism minister Lalnghinglova Hmar chuan, Tourism depatrment-in tuna tourism project hrang hrang an khawih leh buaipui mekte chu cheng nuai 34,990.9 hû a nih thu a sawi.

Lalnghinglova Hmar hian December 8, Thawhṭanni khan ZPM party pisaa inkhawmah thu sawiin, "Tunah hian tourism project khawih mek leh thawh hmabak, sanction awm tawh kan neih zat belhkhawm cheng nuai 34,990.9 a ni. Hei bakah Mizorama tourism project lian ber zinga mi ni thei tur, sum lian tham pawh a lo luh zel kan beisei mek," a ti.

Khualzin hîp turin khualzin lawm dan leh dawnsawn dan a pawimawh thu sawiin Lalnghinglova chuan, "An tlawh duh tur hmunhma kan sawngbawl dan, an lo kal duhna tura event kan siam thiam danah a innghat ang. Sorkar hi sumdawng a ni lo a, hlâwk a tum lo a, mipui hlâwk se a duh. Homestay kan uar dawn a, Bana Kaih hnuaiah homestay scheme kan duang a, CSR aṭangin pawisa hlawm lian deuh homestay atan kan nei dawn bawk," a ti a; community based tourism uar an tum thu a sawi.

Tourism Minister chuan, Mizoram chhung rilah rél a rawn luh tawh avangin khualzin an pun nasat thu sawiin, Aizawla hotel pangngai deuh chu an lun zual hle tawh thu a sawi bawk.