Loneitute solar sprayer sem an ni

Nimin khan Rural Development minister Prof Lalnilawma chuan nimin khan a pisaah MzSRLM leh SELCO Foundation-te thawhhona hnuaia hmalakna peng pakhat atan loneitu mi 11 te hnenah agricultural solar sprayer a sem chhuak.

Prof Lalnilawma chuan nizung chakna hman ṭangkai a pawimawhzia sawiin, "Ram changkang leh ram hmasawn apiangin solar energy pawimawhzia hi an hria a, a hman ṭangkai dan hrang hrangte pawh tunlaia khawvelin a zir nasat leh ram ropuite pawh an intlansiakna pui berte zinga pakhat a ni. Mizoramah pawh solar energy hi hmang ṭangkai deuh deuh turin hmalak chhoh a ni," a ti.

Solar energy lam buaipuitu SELCO Foundation-te nen pawh thawhhona kalpui mek a nih thu sawiin RD Minister chuan, "Solar technology hrang hrangte hmang hian thingtlang lama kut hnathawktu te, self-help group te, loneitute leh sumdawng hrang hrangte pawhin hmasawnna hmel an hmuh chhoh zela, an sum deh chhuahte pawh a lo pun deuh deuh theih nan RD department chuan theihtawp a chhuah zel," a ti bawk.

MzSRLM leh SELCO Foundation-te hian April, 2025 khan thawhhona thuthlung (MOU) an ziak a, nimina loneitute hnena solar sprayer sem takte pawh hi, he thawhhona kal zela hmalakna pakhat a ni.

He thawhhona hian a tum ber chu, loneitute leh ei zawnna hrang hrang kalpuitute tana ni zung chakna (solar energy) hmang khawl chi hrang hrang - solar dryers, solar sprayers, deep freezers, tailoring units, handloom lighting systems leh a dangte hmang ṭangkaia, an dinhmun chawisan leh ṭanpuite a ni.