Chawimawi phute chawimawi hi a Kristian nunzia - Vanlalhlana

Durtlang Leitan Branch YMA chuan December 9, Thawhlehni khan Govt. Durtlang Middle School-III tualzawlah an dincham vawi 39-na an lawm a, an hun hmanpuitu bialtu MLA Vanlalhlana, minister chuan chawimawi phute chawimawi chu Kristian nunzia a nih thu a sawi.

Vanlalhlana chuan hlawhtlinna chungchang sawiin, "Hlawhtlinna thuruk chu taimakna, bei hram hramna, hun vawn dik leh mahni fel taka in vawnte a ni. Chawimawi phute chawimawi hi Kristian nunze pawimawh tak a ni. YMA hi chawimawi phute chawimawi a, ṭanpui ngaite ṭanpuitu pawl ropui tak a ni," a ti.

Vanlalhlana hian an dincham puala Leitan Branch YMA-in chawimawina hrang hrang a siamte chu a dawngtu tura thlante hnenah a hlan nghal.

Leitan YMA Branch hi tun hma chuan Durtlang Branch YMA section pakhat (section A) a ni ṭhin a, November 25, 1986 khan Ramthar area (Section F) nen Durtlang Branch aṭangin an indang. An indan tirh hian hruaitu an nei nghal lo a, branch hming pawh an nei lo a ni. December 9, 1986 khan branch hruaitu thlanna neih a ni a, hemi ni hi an dincham atan an hmang zui. Central YMA-ah Leitan leh Ramthar Area chu Durtlang Leitan Branch tia ziahluh a ni ta a ni.