2026 Synod moderator atan Rev. R Lalrinsanga thlang

Synod Inkhawmpui vawi 102-na neih mekah nimin khan rorel ṭan a ni a, kum 2026 Synod inkhawmpui moderator atan Rev. R Lalrinsanga thlan a ni.

Synod inkhawmpuiah hian nimin chawhma khan moderator kal chhuak Rev. RC Lalnghakliana'n Rev. John Raldosanga hnenah moderator nihna a hlan a, moderator thar kaihhruaiin rorel a ni. Kum 2026 Synod inkhawmpuia puipa tura rawtte an pawm a; moderator atan Rev. R Lalrinsanga, secretary atan Rev. B Zohmangaiha (senior) leh Upa C Lalduhawma (junior), finance officers atan Rev. Dr K Lallawmzuala leh Rev. Vanlalzuata, statistician atan Rev. Lalsangmuana, executive secretary atan Rev. VL Luaia Hranleh leh Rev. Dr Rosiamliana Tochhawng te an pawm.

Tun ṭum Synod inkhawmpuia pastor atana nemngheh tura rawt mi 20 chu pawm a ni a, probationary pastor atana lak mi 15-te pawm a ni bawk. Kum 2029 Synod inkhawmpui nghahna atan Electric Veng Kohhran biak-in an thlan a ni.

Pastor bial thar pasarih hawn tura pawm a ni a; chu'ngte chu Salem Veng Bial, Falkland Bial, Champhai Zotlang Bial leh Dolchhora Bial, Koreng Bial, Ranchi Bial leh Masihi Sangati Serchhip Pastor Bial te a ni. Bangalore North Mizo Presbyterian Kohhran chu bial ṭhuthmun atan pawm a ni bawk.

Synod inkhawmpui rorel hi December 13, Inrinni thleng neih a ni ang.