PHC 3-in NQAS an hmu thar

India rama sorkar damdawi-in ṭha bik tehna, National Quality Assurance Standards (NQAS)-ah Mizorama Health & Wellness Centre-Primary Health Centre (HWC-PHC) pathum – South Lungpher PHC, Bungtlang South PHC leh Tipa PHC-te an tling thar.

National Health Mission (NHM) mission director Dr Lily Chhakchhuak tarlan danin, India rama damdawi-in ṭha tehna NQAS national-level endiknaah hian South Lungpher PHC chuan 86.10%, Bungtlang South PHC-in 87.86% leh Tipa PHC-in 90.90% an hmu a; tun dinhmunah Mizorama sorkar damdawi-in 16 leh HWC sub-centre 31-ten national-level assessment an dil leh mek a ni.

NQAS certified damdawi-inte hi endikna chhawng thum paltlang an ni a, a tawp bera endikna an hmachhawn hi National External Assessment niin, state pawn aṭangin assessor (endiktu) an lo kal ṭhin. Hetah hian a tehnaa 70% an hmuh tlin chuan certified an ni chauh ṭhin a; heng certified tawh damdawi-inte hi natna darh thei ven kawngah te, thawktu zawng zawngte’n an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi-in faina leh dik taka damdawi-in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te, khawtlang nena an thawhhona ṭhat leh ṭhat lohte endikna paltlangte an ni.