KHAWTHLIR

Thisen pe

Adventist Youth Federation (AYF) Aizawl West Circle chuan nimin khan Civil Hospital, Aizawl tan thisen unit 51 an pe a, petute mipa 40 leh hmeichhia 11 an ni.

Chhang siam inzirtir

Mizoram University-a School of Economics, Management and Information Science (SEMIS) leh Mizoram Culinary Association ṭangkawp chuan December 8-9, 2025 khan SEMIS-ah chhang (cake & cookie) chi hrang hrang siam dan inzirtirna an buatsaih a; MZU Dept. of Tourism and Hospitality Management assistant professor Dr Sunil Kumar in a kaihruai.

Hnathawh endik

Aizawl East II Block Monitoring Committee-te chuan nimin khan Aizawl East II huam chhung a MLA fund hmang a hnathawh hrang hrangte an endik a, a ṭha thakhawtin an hria. Committee hi Aizawl East-II bialtu MLA B Lalchhanzova rawtna anga din a ni a, East-II MLA fund hmanga hnathawh hrang hrangte endik tur an ni.

Minister-in tlawh

AH & Vety minister C Lalsawivunga chuan nimin khan Khuanglenga ar vulhtua hmalatu John Lalrinchhana chu a hnathawhna hmunah a tlawh. C Lalsawivunga chuan Mizoram sorkar flagship programme - Bana Kaih tihhlawhtlin tum leh intodelh tuma theihtawp a chhuahna chu lawmawm a tih thu John Lalrinchhana hi hrilhin, department aṭanga ṭanpuina awm thei ang angte pek a tiam a, "Intodelh hi kan thupui leh innghahna a ni a, chumi tihlawhtling tur chuan hand holding policy leh kawng hrang hrangin sorkar dept tinin hma a la mek reng a ni. AH&Vety department pawhin theihtawp kan chhuah," a ti.

Sorkar hnathawk intuaithar

Administrative Training Institute leh Mizoram State Legal Services Authority ṭangkawp chuan nimin khan Lunglei Convention Centre-ah sorkar hnathawkte tan dan hriatna lama intuaitharna 'Special Awareness Campaign on Legal Provisions & Matters for Government Officials of Mizoram' an buatsaih a; Lungleia sorkar office hrang hrang aṭangin officer leh staff-te an tel.