Zaninah Mizo Award 2025

Vanglaini chanchinbu-in kum thum dana a hlan ṭhin Mizo Award chu zanin hian HYVE Aizawl City Hall-ah hlan a ni dawn.

Mizo Award hi Mizo zinga mi hmingṭha, ram leh hnam tana thawh hlâwk, mi chhuanawm bikte hnenah hlan ṭhin a ni.

Kum 2011 khan hlan ṭan niin, kum thum danah hlan a ni ṭhin. Mizo Award hmasa ber chu kum 2011 khan chief minister hlui Brig. T Sailo hnenah hlan a ni a, kum 2014 khan TNT dintu Sangthankima hnenah hlan niin, kum 2017 khan Prof. Joy L Pachuau hnenah hlan a ni.

Covid-19 lêng avangin kum 2020 khan hlan theih a ni lo a, Covid lêng kian hnu, kum 2022 khan sem leh niin, zirna sang (higher education) lama thawh hlâwk tak Dr Tawnenga hnenah hlan a ni.

Kumin 2025 hi Mizo Award hlan hun a lo ni leh ta a, zanin dar 8-ah hlan a ni dawn. Award hlanna inkhawm hi ZONET Zawlbuk leh ZONET Youtube channel-ah live-a tihchhuah a ni ang.

Mizo Award 2017 : Prof. Joy L Pachuau

Prof. Joy Lalkrawspari Pachuau hi April 13, 1969-ah Ramhlun North, Aizawlah a piang a; Mizo zinga Oxford University, United Kingdom aṭanga doctorate degree la thei awm chhun a ni.

Joy L Pachuau hian lehkhabu leh research paper eng emaw zat a tichhuak tawh a; a lehkhabu tih chhuah zinga pakhat - ‘Being Mizo’ tih chu India rama history lama pawl intêlkhawmna lian Indian History Congress chuan kum 2012-2014 inkara history lam hawi lehkhabu chhuak ṭha berah a thlang nghe nghe.

Zirna kawnga Mizote hming khawvel hriata pho langtu, academic lama mite ngaihsan, Mizote chanchin hriatna lama thawk hlâwk tak a nih avangin kum 2017 khan Mizo Award dawng tura thlan a ni a; December 9, 2017 khan Berawtlanga Cultural Centre-ah Mizo Award 2014 dawngtu Sangthankima'n a hlan a ni.

Mizo Award 2022 : Dr Tawnenga

Dr Tawnenga hi May 16, 1953-ah Serkawn, Lungleiah a piang a, zirna sáng (higher education) lam hmasawnna atana a thawh hlâwk avangin Mizo Award 2022 hlan a ni a; PUC principal hlui Saingenga'n December 1, 2022 khan HYVE Aizawl City Hall-ah award hi a hlan a ni.

Kum 1978-ah PUC-ah zirtirtu hna a thawk ṭan a, April 6, 2009 aṭanga February 28, 2021 thleng thawkin, PUC-ah hian a pension thlengin Principal a ni. June 1, 2022 aṭangin Mizoram Christian College-ah Principal a ni bawk.

Dr Tawnenga hi PUC-a a thawh chhung, a bikin Principal a nih chhungin a hmaa la awm ngai lo thil eng emaw zatah bul a ṭan a; college-a zirna, inthununna, faina, hun vawn dik, ruhrel din leh thil dang dangah hmuh theihin hma a sawnpui a, NAAC accreditation A+ grade hmu thei khawpin PUC hma a sawnpui a ni.

A hun laiin UGC-in College with Potential Excellence-ah PUC a thlang a, National Institutional Ranking Framework chuan India rama zirna sang thiam dan indawt a siamah PUC a lang phak a, kum 2018 khan PUC-in ISO certificate a dawng pha bawk.